Sape Kek Ngeretak E

Senin, 14 Januari 2013

Lagak e lah ke tingok
Dari siang tadik nya ngeluap
Sampai ujong kulong
Ngape neg ngeruce-ngeruce?

Biaklah semue ni
Ngerameng bai lah nya to
Biaklah
Sape kek ngeretak e
Biaklah

Ku
Jatoh sampai telungkop di sini
Sampai dak tau agik kek nama e jam
Aik mate pon lah saro neg nites
Saking nue e

Ngape takot
Ngape ngeruce

Jalen to teros ade
Kayak yang di ajar kek Pak Ijazi
Pasti ade
Same kate Pak Manto

Ku Ukan Urang Baek-baek

Minggu, 11 Juli 2010

Aok
Ku ukan urang baek-baek
Tapi ku cuman berusaha untuk ngindar ang jiat sepacak ku
Semampu ku yang pasti ade bates e
Semue kurase tau tu

Sebab
Kadang e jalen to maksa untuk jadi urang jiat
Yang dak pacak diliwat untuk di ilak
Kadang yang jiat to nawar segale yang manis-manis dimate
Sampai lidah ngerayu utek untuk ngikot
Ade masa e kadang kite harus jiat
Dak pacak dak untuk jiat

Jadi
Selame pacak di ilak di ilak duluk
Ku ge ukan urang baek-baek
Selama pacak di tolak di tolak duluk
Ku ge hanya manusia biase

Cuman pacak ngumong
Mudah-mudahan dak ketemu yang jiat-jiat
Biar ku tetep dak jadi urang yang jiat
Biar idup pacak mati sambil senyum
Sepatau e surge agik nek nerimak tingkah ku.
Yo mudah-mudahan bai.

Ku Baru Ngumong Kek Die

Entahlah banyek semot di utek e
Ngumong pon rase e dak nyamen
Dak kayak dulu
Malah kayak e semot e di piara

Cemane agik
Disemprot kek miyak tanah semot e sembunyik di utek e
Di bunuh sikok-sikok ge cemane bareng e didalem utek
Atau malah kayak e imang didiem bai
Biak beranak sampai cucuk e jadi atok-atok

Mungkin di biar bai ok?
Sampai utek e leteh ngerase dikerunet-kerunet semot
Sampai embun-embun pagi dek agik inggep di paser-paser
Sampai panes e paser dek neg ilang sederajat pon

Dari mane nya dapet semot to?
Ape mimang dicarik ok?
Biak nya pacak buet sareng semot di utek e
Atau dari utek urang laen yang lepas lari ke utek nya

Entahlah
Yang pasti ade semot di utek e
Harus e dibuang jauh-jauh

ku ukan

Senin, 17 Mei 2010

Ku ukan peramal yang pacak ningok ati urang
Ukan dukun yang pacak segale e mintak urang
Sampai ka dateng ke ku mintak segale yang kudek tau
Ku cuman budak yang gile kek segale yang gile

ka kek ku cuman urang laen
Dak lebih dari tu
Cube ka liet tingkah laku ka
Ka kek ku jauh bebeda
Tu dari segi yang keliet
Ape agik segi yang dak keliet

Item ka to mimang bagus
Tapi kelakuan kan dah mesti item
Cukoplah ka dateng mintak yang ku dek de
Jangen ngarep yang macem-macem
Banyek yang dek beruntong e dari yang beruntong e di idup ne
Jangen ka nambeh banyek tingkah
Cukop disini bai
Ketimbang ku nyarot kek ka
Ke segale carot-carot yang ade

Kembang pasti mati kalok dak dirawat
Kalok ade yang punya yang punya ngerawat e
Tapi kalok tumbuh liar kembang to harus ngerawat sendirik
Jangen ngarep urang laen
Ape agik sampai kek maken kembang laen ne

Idup ne dak de yang nyamen
Meskipon cemane keadaan ne
Kite cuman numpang idup didunia ne
Jangen dak pecaye
Segale yang idup ne pasti mati
Entah kapan entah kite dak tau
Tapi pasti

Kalok ade urang nanyak ko

Kalok ade urang nanyak bilang ko lah mati
Ditimbak belande pecah kepala e taon 1945
Pas waktu lengah ku
Pas leteh ku
Atau
Bilang dek de agik kedenger name ku
Lah lama dek kedenger di bilong ikak
Kalok yang nanyak kurang puas, bilang bai kuat-kuat
Sampai urang to dak nanyak agik

Dak de agik cahaya mulia yang nyinar jalen
Tu cuman menghayal e urang-urang
Hayal e urang dek de gawe laen
Sege cahaya cuman ade di mimpi
Mulia cuman untuk penghianat-penghianat ati

Sampai tahlil-tahlil pon du ucap urang-urang
Tetep bai cahaya dak de mulia

Mending nunggu pagi yang bejanji jatoh embun
Dingin e lebih seger
Arep e lebih pasti
Malah
Kembang-kembang laleng pon makin mekar
Diselak dingin e nya diberik setites embun
Pas panes e musim ne
Di tengah-tengah belukar yang dek lebet
Bekas nanem padi yang dek subur

Burong-burong puyoh pon lak dek pacak mandik agik
Saking panes e paser-paser ni
Dimane cahaya mulia?
Lah ko bilang dak de cahaya mulia kan?
Cuman hayal e urang gile
Cuman hayal e urang yang dek pacak menghayal

Dunia Buangan

Selasa, 27 April 2010

Entah sampai kapan ku betahan dari dunia ku di buang
Trus ku mintak-mintak rahmad e Tuhan ku dari tiap jalen e tempat yang mengasingkan badan ne
Sampai badan ne dak kuat ntuk lari dak kuat nangis untuk ningok muka Mak kek Pak

Jauh dari jalen cuman kedenger bisik-bisik e suara Pak kek Mak ku
Nuntun jalen ne yang tambah mirah tambah ku mintak arah
Panggil lah ku kearah yang mimang jalen pulang ku untuk dapet rumah ku surga ku
Biak ku liet senyum e anek bujang ku yang baru nek besak

Jauhlah dari berkibar e bendera-bendera berhala dari sudut ujung jaman ne
Biar ku pacak bawek Anek ku surga, bawek Bini ku ke adep Tuhan ku
Walau ku tau ku dek pantes untuk surga Mu
Biak lah ku mintak sedikit dari segudang rahmad Tuhan ku
Dari gelisah e badan kek jiwa ku
Dari jiat e mimpi malem ku

Dak de juged-juged di depan umah untuk kami biak jadi sahabat diantara umat
Diantara segale urang-urang yang beriman
Kek jadi pengikut imam-imam yang idup sebelom kami
Sebagai pengikut umat Nabi Muhammad S.A.W

Dak de tangis laper e perut anek-anek kami
Biak pacak kami nurun keturunan yang kuat kek sehat
Untuk pacak ngadep ari yang makin siang
Biak kuat ngadep panes siang e
Kuat ngadep dingin pagi e

Inget lah

Kamis, 14 Januari 2010

Inget lah,...Ku pernah jadi bagian ne dari bumi ne, urang yang pernah idup di bumi ne, walaupon tinggi e angen yang bawek awan sampai ke langit, walaupon kembang-kembang lah mulai layu pas ari mulai pagi, tapi ingetlah.. Ku pernah nulis di kertas putih jalen idup ku, pernah muat ari-ari ku kek segale tawak kek tangis e badan ne.

Inget lah, Ku pernah ade di depan muke ka, pernah ngumong akrab kek ka, pernah nyusun same-same cerita kite pas tu, pas urang-urang tiduk males bangun, pas gelep e malem mute mate langkeluit, pas marah e pak Azhari sampai muat piker ne terus ngeneg jiat e jalen ne.

Inget lah,... Ku ne anek urang yang beda care bahasa kek tingkah e, beda care ningok kek miker e, beda care e kite...Inget lah pas kite denger same-same tangis paser-paser puteh ne di panes e mentari, pas ikan-ikan aron ngerik ningok aik kulong ne berubeh, pas ikan tepalak ijau pegi pindah ke lelap belakang umah,...Inget lah.

Malem Jum'at

Bejuget di sudut  e kamar  ku, di antara tige gambar yang dek jelas arah e dek jelas bentuk e, trus belalu sampai badan ne leteh sampai mata ne ngantok ntuk ngadep ke arah yang makin gelep.

Ku cube terus jalen ngelanjut ape yang ku rase kurang, tambeh parah, lagu-lagu yang musik e dek ku taul makin mawek ati ne dek tau arah, malah sampai kepala pon ngikut beguyang, ukan ku dek seneng!!! tapi liet malem ni!!! malem jum'at, cube piker-piker!!!

Dak de agik urang-urang bace yasin pas abis sembahyang magrib, dek de agik urang liwat pakai kopiah pas neg nunggu magrib, dek de agi suara budak-budak ngaji yasin malem-malem ni.

Mimang dak aneh, tapi terase ilang e, terase hampa e, ari terus beganti, musim cempedak pon lah dateng, kapan terakhir kali maken cempedak? atau lah lupak rase e, mimang dak aneh, tapi ade yang ilang kan?

Cube bepiker sebentar...

Nah besok mungkin bakal ade gerhana matahari

Besok mulai belajar angka 0 kek 1

Besok marah pon dak de gune

Besok ku dapet ape yang ku neg.

Untuk kawan ku

Senin, 04 Januari 2010

Kelak-kelak e, malem kite rase kayak awan yang terus ngambang, trus bateng-bateng cuman jadi hiasan 3D yang nyamen diliet, cemtu ge urang-urang deket-deket kite, berubeh warna mata kebennya jadi item penoh kek bebulek e, Ape yang ku berik kek ka dunia? Dak de rupe ka yang pacak ku gambar tentang ka, dak de maya yang mengilhami nirwana. Ku cuman pacak bilang "yang neg tejadi, tejadilah" untuk segale cerita.

Cemtu pon pas kembang-kembang laleng lah mulai kering, ku hanya ningok mekar e, dak pernah ngerase wangi harum dari puteh warna e, atau ningok ketawak e pas terbeng e nyebar bibit-bibit di angen yang panes e nusuk mate, malah kayak dak de tenage neg ngambik sikok bijik dari yang terbeng-terbeng to untuk ngisik tanah ku yang lom subur, ape arti ku mentari? Panes ke ngelemah ku dari segale jiwa kek ati ne, ngape dak kuat nafsu ne nanggong rase rindu yang terus terase diati ne?.

Ku tau ka pon tau sayang, ka tau ade segumpel emas yang ka tinggal untuk buet jadi perhiasan paling mahal yang ka buang di gelap e malem sampai jam yang dek ka inget agik, pas urang-urang kebun dek sadar agik arti e idup, sampai pulau-pulau kecit pulau seribu tenggelem ilang ditelen ganas e idup, ku tau ade sinar dari sudut mata e lukisan Leonardo da vinci yang buat mata e terus ningok e sampai dek pacak bekedip, sambil mulot terus ngerameng dari bagus e. trus untuk ape warna-warna di idup ne?

Tinggal segudang mimpi yang ku tulis di kitab-kitab tua, buet resah ati untuk dibace terus e dak de arti e untuk budak-budak bujang.

Lah ku tebar duri-duri di segale jalen ku

Minggu, 03 Januari 2010

Dari mulai jiat e muka sampai dek ngeretak apalah ari
Ape yang kudapet?
Duri-duri e ngentem kaki ne sampai lama dek pacak bejalen
Nikem ati ne sampai nangis pon dak de agik gune e

Ku ganti nebar segale cinta kek kelembutan di tiap angen yang ade deket ku
Ku hias kek segale seni yang ku tau
Warna e pon paling bagus diliet segale mate urang
Dek pandang bulu
Ape yang ku dapet?
Segale tu kalah kek nafas e urang-urang munafik
Urang-urang yang utek e dek pernah di cuci
Malah ku tebuang jauh dari jalen ku

Ku cube pasrah
Diem dek begerek kayak urang-urang yang gemok badan ne
Berarep ku ge pacak gemok kayak tu
Ape yang ku dapet?
Ari beganti ari utek makin terase mati
Badan mulai terase ade penyakit didalem e
Sampai mati suri due kali

Trus
Ku neg cemane agik?
Lari salah diem pon salah
Jahat mati baek mati
Ape segale ni mimang jalen
Ape ku ne dak jadi kayak ape yang ku neg
Lah nua lah, umor pon lah tua kek di buet maen-maen
Ku ge neg lah ngerasa idup ne bener-bener idup
Kayak yang lah kuliet

Ape dak pantes?
Trus kalok dek pantes ngape ku disini
Ngape ku agik ade
Ku lah dek tau agik lah bingung e
Neg marah ge marah kek sape, ngeruce kek sape
Badan terase kayak paser di pinggir laot
Terus disiren ombak ketengah kek dikit-dikit tenggelem
Kayak pulau yang digalik paser e nunggu waktu e bai ilang tenggelem di tengah laot

Sejauh mane ati ne pacak nahan

Sabtu, 02 Januari 2010

Sekuat ape badan ne pacak migang
Pas ngerasa lah dapet, tetep bai kayak e mudel ukan nasib dirik
Ukan untuk dirik
Trus cemane?
Masak dari duluk cuman jadi tukang mimpi
Cuman ningok kek nahan ati

Sejauh mane ati ne pacak betahan
Sekuat ape badan ne pacak migang
Peduli kadang malah kayak racun yang kek bunuh badan
Ngeloh malah tambah jadi ngerusak ati yang lah rusek
Nangis? Tambeh kayak urang budu yang dek de tujuan ne bejalen

Trus
Sekuat ape badan ne pacak migang
Sejauh mane ati ne pacak betahan
Disamping mate ne ningok kanan kiri yang mulai ngerase dak sesuai
Jauh dari pandang e urang yang pacak mandang

Mimang mawar to harum sesuai kek penunggu e
Angen digunung to sejuk sesuai kek tinggi e
Tapi tinggi kek penunggu kan dak terus-terus sesuai untuk di adep
Malah kadang lah diadep pon dak sesuai harum kek sejuk e

Entah lah
Ku pikir-pikir duluk
Banyek urang dak beruntung dari pada urang yang beruntung
Banyek urang nangis dari urang yang ketawak

Ku kurang ngerti kek rasa e betunang

Kate urang-urang
Rase e kayak di belai lembut e wangi kembang mawar
Kalah seneng e pas hari raya dateng
Macem ketemu kek kawan lame, kawan-kawan sekulah duluk
Malah kayak nyamen e angen di pantai Tuing pas waktu surut dateng

Entahlah

Tunang to dak same kek bini
Yang pacak bener-bener dipecaye
Nerimak segale ke kurang e kite

Ku piker hal-hal jiat e
Yang ku rase kayak “gas emisi CH4” yang terus ngancem
Walaupon “senyawa saponin” pacak neken ade e zat to
Atau kadang-kadang kayak isik dari "Timaeus kek Critias"
Yang terus bai jadi tanyak e urang-urang di dunia

Entahlah
Mungkin ku bai lom tau masuk daerah tu
Lom jauh atau mudah-mudahan dak kek jauh masok ke situ

Bagi ku
Cukop ku simpen di ati
Dak usah banyek ulah
Cukop sekedar ngisik jalen yang biru ne
Yang cuman hanya sekali ketak ku liwat sini

Pegilah Ku Ikhlas Ngelepas E

Rabu, 16 Desember 2009

Serindit ku lepas pas ku pegang
Terbeng jauh dek tau agik arah e
Entah kemane, paling-paling nyarik bini e
Yang lah lama nya tinggal pas dari nya ku tangkep duluk
Atau nya nyarik bunge rembiak yang banyek di lelap kampung sebelah
Dek neg agik maken tebu puteh yang ku berik tiap ari
Atau pas dak de malah cuman bungkal nasik puteh bai

Biaklah

Sambil nangis ku ningok e
Sambil ngeruce-ngeruce ku ningok e

Biaklah

Nya idup di dunia bebas
Dak nyusah ku berik maken e
Dak leteh-leteh ku bersih sangker e
Paling kelak-kelak anek ku pacak ketemu kek anek-anek nya
Ade ge kek jadi kisah pas jaman kelak kayak kisah akek antak

Ku agik inget warna e
Ijau ade mirah-mirah e dikit di arah kepalak e
Kayak daun sahang pas subur-subur e
Kaki e kecit biase tiduk e begantung kepalak e dibaweh
ku agik inget

Ku cuman pacak be do'a bai
Biak nya dak saro idup e
Idup di utan yang semakin ari semakin susah
Semakin lama semakin parah

Ku cuman pacak bedo'a bai
Biar nya ade rejeki nyarik ilmu agama
Pacak ngaji kek ngamal ilmu agama e
Biak dek susah di akhirat kelak dak jadi tanggung ku diakhirat kelak
Atau pacak dapet bini yang pinter kek agama
Pinter kek situasi dunia
Ku ikhlas nya lepas
Ku ikhlas
Demi masa depan e yang agik panjeng
Agik pacak ngelukis indah di muka-muka dunia
Ku ikhlas
Ku ikhlas

Ku kek kulong ne kayak budak Bini kek Emak e

Yang tiap tiduk di nyanyi lagu melayu nganter tiduk malem e
Senyum mendukung segale tingkah e
Dari segale belai mesra biru aik e
Segale warna bateng-bateng ketakung pinggir kulong ne

Macem ikan kiung kek anek-enek e
Trus jage kek terus jage
Tuntun arah langkah jalen takot keseset
Usir ikan-ikan besak laen yang nek deket-deket

Atau

Kayak kariamon yang ade di kulong ne
Trus tumbuh kek terus bekembang
Buet biru warna dalem aik ne
Buet tempet ikan aron sembunyik dibaweh e
Malah kadang udang-udang kecit pon ngikot sembunyik

Kek kebennya lah ku pacak ngadu panes e mentari ne
Riak angen nya lah yang pacak buat ati ne senyum
Kerumun ikan kemuring lah yang makin nyeneng hari-hari ne
Dari segale tajur yang lah ku paseng
Segale tepalak yang maken pancing ne

Ku malah ilang senyum pas ninggal segale ni
Serase ilang arah ngelangkah kaki ne
Meski ku carik-carik di daerah laen
Dak same dak kek pacak same kek kulong ne
Meskipon dipaksa-paksa dak kek same
Malah tambah sedih ati pas nginget e

Ape agik pas lah kek magrib
Ku mulai gelisah kek arep ku ningok belido
Ningok ikan bulan ngelupor-ngelupor
Yang kadang muat gelisah ati ne
Takut dak pacak agik ningok e di masa-masa kelak
Muat sedih ati ne
Takot pagi dek dateng untuk ngangkat rawai-rawai ku
Pas ujan-ujan malem ne ku cuman banyang bai
Ape yang ku arep ape yang ku neg
Ku cuman nunggu pagi entah dateng entah dak
Walaupon embun-embun e lah mulai terase
Walaupon dingin e lah mulai ku rase
Tapi tetep ku terus ngarep

Subuh lah dateng, embun-embun pon lah mulai turon

Selasa, 15 Desember 2009

Mulai terasa dingin e alam ne
Angen dak agik neg bekawan, mulai nikem-nikem dade
Mata ku yang dari tadik mbukak lah mulai ngantok
Piker ku tetep miker ari-ari ku yang dak terase lah jauh ku lari
Lari dari tatap mata e urang-urang yang lom ku kenal
Dari tempet yang kayak e ukan untuk ku

Sampai kapan
Dimane terakhir e

Ku mulai inget ku inget-inget
Jauh dari umong e urang-urang tua
Kalok idup ne dak kek abis kalok dikejer
Dak kek cukup umor ne untuk ngejer e
Mending berenti ditempet dimane kite nganggep jalan idup to ade
Atau teros nyarik tempet-tempet dimane kembang-kembang senyum kek kite

Dimane
Ape name e

Ku ge dak tau arah jalan e yang ku liwat ne
Kadang malah ku liet simpang-simpang jalan yang dak belampu mirah
Maksa kaki untuk cepet liwat sebelum ditumbur urang laen
Meski nama e balak dak pacak ditolak
Tapi usaha harus tetep ade kek harus ade
Dak de kate-kate nyerah liwat segale yang ade di idup ne
Walau ku tau idup cuman jalan untuk mati
Atau idup cuman numpang didunia yang dibuat Tuhan
Tetep bai ku teros tetep lari
Sampai kaki ku leteh

Ape ge
Pacak macem tu pulik

Ku ambik selimut nutup badan ku yang kurus
Biak dak pacak ditingok angen yang makin marah ngeliet ku
Biar pisok-pisok nya dek pacak nembus badan
Sampai panes e badan ku lah mulai terasa
Kek kaki ku lah mulai gemeter
Ku paksa mata kek badan ku tiduk
Tinggal segale piker-piker ku
Yang teros nanyak kek ati ku
Maksa teros untuk ko jawab semue tanyak e

Kayak e ade sangker murai di bateng kelapa pinggir umah kita pak

Ku liet enduk e berape ari ne muter-muter bateng kelapa kita
Kuliet ade due murai di situ tengah betunang
Keliet mesra e, biase e tinggkah murai item to dak macem to
Tengah seneng-seneng e mungkin
Liet lah pak!
Kemane-mane kebennya bedue terus, nyarik maken bedue, mandik bedue, duduk ge bedue
Entah yang mane laki-entah yang mane bini
Bagus kayak e kalok ditaruh di pinggir umah kita
Suara e kayak urang tengah besiul bawek timah banyek
Entah bateng yang mane
Warna e idup kayak lukisan e gambar cewek yang pacak ngeliet kiri kanan mata e

Dak salah kalok ku ambik ku bawak anak e untuk ku pelihara pak ok?
Biak umah kita ade suara e burung murai
Biak tambah hiasan umah kita yang lah mulai rubuh ne
Paling dak ade yang kite bangga di umah kite ne pak
Dak susah igek kalok diliet urang
Kalok ade tamu ade yang kek di umong pas nya bebunyi

Tapi cemane enduk e kalok ku ambik anak e
Pasti lah nya nangis pak ok?
Kayak ayem yang nyarik enduk e
Cuman kite bai yang dak tau cemane suare e nangis
Kata kawan ku kalok anek e diambik enduke teros ngikot nyarik anek e pak
Berarti kuat sayang e kek anek e
Kasian ok
Kite ge cuman manusia, kadang dak sepanjang tu kite miker pak
Padahal kite kek nya sama-sama idup di bumi ne
Biarlah nya numpang beranak di bateng kelapa kite pak ok
Kalok yang duluk ku cuman mintak maaf kek Tuhan pak
Ku cuman manusia yang lemah, deket dari lupak, kecit pikir e
Ku tau Tuhan ku Maha Tau, Maha Mengerti ape-ape yang tejadi
Ku cuman pacak mintak maaf bai pak
Mudah-mudahan pacak burung murai yang kemaren to berik maaf ko

Pas pagi lah mulai dateng

Pas mentari mulai sebar panes e ke seluruh dunia ne
Kembang-kembang depan umah mulai ketingok bagus warna e
Wangi bauk e pon lah mulai terasa
Badan mulai ngerase letih, ngantuk, lemes
Tros ku cube untuk jalan kaki ngeliling daerah yang jarang ku liet disini
Sampai kaki terasa dek neg agik ngelangkah
Ku bawak badan pulang
Ngeringkes nyiap-nyiap untuk tiduk
Sambil ngerameng mulut ku ngumong
“selamet tinggal dunia, ku ngulek pas urang-urang ninggal ka”

Jauh dari mimpi ku yang agik takot kek mati
Untuk terus pacak begawe kayak urang yang normal idup e
Yang kata ati e dak takot kek segale ape-ape yang tejadi
Ku pon senyum
Ngeliet gambar muka ko yang lah semakin tua
Semakin dek berupa untuk ukuran ganteng
Siur-siur ku denger suare lagu
Buat badan begerek tambah gelisah

Ngulek agik jauh dari mimpi ku yang agik takot mati
Masuk dunia yang lom pernah ku liet
Serasa segale e ade
Dak de harge e duit, dak de harge e idup, dak de harge e mati
Kayak e seneng dak banyek mikir antara dunia kek akhirat

Tros
Ade nduk sukok liwat pinggir kaki ku
Terase ngelitik kaki ku
Ku bangun
Ku sadar

Mentari lah bener-bener terang
Siang lah dateng
Mata ku lah mulai berat
Ku ngerameng sekali agik
“selamet tinggal dunia, ku ngulek pas urang-urang ninggal ka”
“selamet tinggal dunia, ku ngulek pas urang-urang ninggal ka”
“selamet tinggal dunia, ku ngulek pas urang-urang ninggal ka”
“selamet tinggal dunia, ku ngulek pas urang-urang ninggal ka”
“selamet tinggal dunia, ku ngulek pas urang-urang ninggal ka”

Tunang ku

Minggu, 13 Desember 2009

Sampai kinik ku lom sempet bilang ku seneng kek ka
Walau ku tau, ka seneng kek ku
Dari tiap senyum sambil terus nyebut name ku pas temu
Dari terimak e ka kek ku ape ade e
Sampai cara ka ngadep ku waktu tiap-tiap betatap muka
Yang lama sekitar setaun setengah kite besame

Kite pacak liet tunang ku
Banyek cerita “cinta tak harus memiliki” tapi teros saling mendukung sampai mati
Mungkin tu lah separo e kisah kite
Kisah yang dak akan diitung kek cucuk-cucuk kite
Yang terus kite simpen di ati kite sendirik-sendirik

Samapai hari ni kite lah beganti-ganti masa lom temu-temu
Tapi yakin bai
Ku terus dukung ape yang ka gawe
Ape yang ka ingen
Ku iring do'a agar dapet tercapai ingen ka

Kayak kulat pelawan yang tumbuh cuman sebentar
Dak kek jauh dari bateng pelawan
Walau beda jauh hubungan e antara kayu pelawan kek kulat to
Tapi tiap musem ujan kek banyek peter pasti nya ada dideket kayu pelawan tumbuh e

Atau kayak
Bujang antan yang dari kecit pisah idup kek mak e
Tetep mak e ngerasa seneng, yakin anak e salamat idup e disungai payak benue

Kite ge macem tu lah harus e mungkin tunang ku
Dak pacak besatu tapi tetep deket rasa e diati
Dak pernah temu tapi ade kek terus idup diati
Sampai kite mati kalok mimang dakde jodoh untuk kite

Pas lah neg pulang

Tinggal prepas ku ditengah-tengah belukar
Di tengah ume pak yang lame
Ku ratap, Ku ratap

Ketapik Ketapang Pinggir Ume
Ku selik Ku datang ku tingok Ka Kene 3X

Lepas kek segale arep do'a-do'a
Sampai sure baru dateng gi nyelik
Ngarep puyoh pulang kesangkar e liwat
Atau pas puyoh madik

Mintak jangen kepon, jilat telunjuk tangen kanan gaser ke siku kiri
Mintak jangen kepon, jilat telunjuk tangen kiri gaser ke siku kanan
Neg gi kekulong ijau
Belakang komplek TTB


Cuman budak dek tau apa-apa
Mintak tulong kek segale yang ku dek liet
Entah bujang antan, atau nek unyil
Segale e

Akek, nek penunggu ku numpang liwat
Cucuk ikak cuman numpang nyacarik idup

Entah jauhlah segale yang jiat
Jauhlah balak jauh lah
Tajur-tajur ko jadi bukti
Jadi saksi ku cuman nyarik idup
Perepas ko agik nancep
Tande dakde yang liwat dari tadik atau kayu e keras
Kulong ijau pon agik tetep ijau
Tinggal ari terus berubeh beganti malem
Ngajak badan untuk mandik kek sembahyang

Lagu lagu melayu

Sabtu, 12 Desember 2009

Bisik-bisik di bilong ku, teros ku denger nya nyelimot badan ku
Dari panas e hawa paser kulong ijo
Sampai dalam e laot bedukang
Teros muter-muter rayu ati ku
Apa maksud e, Apa gune e
Ku mulai pening miker e

Ari pon mulai malem
Same-same kek mega mirah nya pon makin nyamen
Ombak-ombak yang tadik pagi begulong-gulong
Kinik tinggal kayak aik kulong kenak angen
Aik laot pon mulai surot
Jauh ku liet ke depan lah keliet paser pantai e

Tapi
Lagu melayu teros malah makin kuat
Dak sebates bisik-bisik agik
Malah kayak urang karaoke
Kadang-kadang sekali-sekali
Ku dengar suara urang besurak-surak seneng
Malah mulai ngajek kaki ku untuk gi ngeliet e

Ku tahan ati untuk tetep disini
Ditempet ku pacak ngeliet paser pantai bedukang
Samping pantai tuing kata urang-urang

Trus kayak e ade suara miak
Suara yang dek kek ku lupak di bilong ko
Ketawak e acit mimang kuat
Entah, mimang miak kinik lah gadis kok

Ku tahan ati untuk tetep disini
Malah ku piker-piker mending pulang
Badan ku lah mulai leteh
Ikan-ikan ni pon lah mulai lemah
Ku takot busuk kalok ku lambet pulang

Trus lama ku miker
Akhir e mimang bener
Ku mending pulang
Kasian mak kek pak lah nunggu di umah
Pasti mak takot kalok ku lambet pulang
Biarlah suara tadik trus ade
Ku mending pulang
Adik kek akak ku lah nunggu
Walaupon ya ben atau semacem e
Mending ko pulang
Ade ari isok untuk ku