Inget lah

Kamis, 14 Januari 2010

Inget lah,...Ku pernah jadi bagian ne dari bumi ne, urang yang pernah idup di bumi ne, walaupon tinggi e angen yang bawek awan sampai ke langit, walaupon kembang-kembang lah mulai layu pas ari mulai pagi, tapi ingetlah.. Ku pernah nulis di kertas putih jalen idup ku, pernah muat ari-ari ku kek segale tawak kek tangis e badan ne.

Inget lah, Ku pernah ade di depan muke ka, pernah ngumong akrab kek ka, pernah nyusun same-same cerita kite pas tu, pas urang-urang tiduk males bangun, pas gelep e malem mute mate langkeluit, pas marah e pak Azhari sampai muat piker ne terus ngeneg jiat e jalen ne.

Inget lah,... Ku ne anek urang yang beda care bahasa kek tingkah e, beda care ningok kek miker e, beda care e kite...Inget lah pas kite denger same-same tangis paser-paser puteh ne di panes e mentari, pas ikan-ikan aron ngerik ningok aik kulong ne berubeh, pas ikan tepalak ijau pegi pindah ke lelap belakang umah,...Inget lah.

Malem Jum'at

Bejuget di sudut  e kamar  ku, di antara tige gambar yang dek jelas arah e dek jelas bentuk e, trus belalu sampai badan ne leteh sampai mata ne ngantok ntuk ngadep ke arah yang makin gelep.

Ku cube terus jalen ngelanjut ape yang ku rase kurang, tambeh parah, lagu-lagu yang musik e dek ku taul makin mawek ati ne dek tau arah, malah sampai kepala pon ngikut beguyang, ukan ku dek seneng!!! tapi liet malem ni!!! malem jum'at, cube piker-piker!!!

Dak de agik urang-urang bace yasin pas abis sembahyang magrib, dek de agik urang liwat pakai kopiah pas neg nunggu magrib, dek de agi suara budak-budak ngaji yasin malem-malem ni.

Mimang dak aneh, tapi terase ilang e, terase hampa e, ari terus beganti, musim cempedak pon lah dateng, kapan terakhir kali maken cempedak? atau lah lupak rase e, mimang dak aneh, tapi ade yang ilang kan?

Cube bepiker sebentar...

Nah besok mungkin bakal ade gerhana matahari

Besok mulai belajar angka 0 kek 1

Besok marah pon dak de gune

Besok ku dapet ape yang ku neg.

Kemane Ka Kawan...???

Lame dak ketemu...Dari ilang e embun pagi sampai dateng e bintang yang ngias bulan, dari bising e gelumbang ngamtem batu karang, dari tanggal 10 april 1932 jam 11.00 malem sampai detik ne.

Kalok ketemu agik........
Tuanglah jernih e aik ke dalem cangker yang nunggu di depan mate untuk terus penoh kek sejuk e mimpi

Berik lah setites wangi-wangi e minyak wangi di impak-impak e jiwa yang dek neg ngerabek arti kek makna e sejuta kunang-kunag yang terbeng di dingin e malem

Atau malah
Buanglah gelep e malem yang ngelingker di leher dari sekian banyek e urang-urang yang dek pecaye kalok ku ne ade, ku ne nyata, ku ne bagian dari bumi yang kite pijek sekarang ni.

Sebab ari

Waktu yang muet ati ne terus nunggu pas dateng e sinar mate ka di depan tempet sembahyang yang galek dipakai kek pak pas waktu subuh e

Trus ngebayang-bayang jalen yang makin jadi bayang-bayang, kadang malah buet muka ne jadi tambeh mirah ati tambeh sedih badan ne pon jadi lesu 

Sampai kinik agik ngarep terang e ari-ari yang terus ade di depan langkah kaki ne, biak terus tiap jegkel e pacak diambik hikmah e, untuk anek cucuk kelak. 

Ku Tanyak Kek Kembang...!!!

Senin, 11 Januari 2010

Malem lah jadi siang, siang pon lah jadi malem, kemane ka kembang? Ka simpen rahasia ku di sudut ari ka buet jadi segenggem embun yang mulai muai dari mata ne. ka tau dek kembang, ku tau sebener e ka tau kalok ku dak tau ape warna kek cemane wangi e ka, sampai lupak ku kek segale bayeng-bayeng ka yang abstrak, warna ka yang penoh kek warna e, ngumong lah kembang, biak ku pacak ngikut alur cerita ka, biak mimpi ne ngulek agik, biak ku tau cerita muka ka, jangen ka diem kembang, ku agik duduk di sinik nunggu ka ngetik nunggu nuansa ka, ku tunggu bekawan kek lagu-lagu yang ngundang segale rindu, kek tige binatang yang terus ngajek begagit ku.

Ngulek agik ku nanyak, pas lagu-lagu mesra menyeriangi muka e di depan ngelawan angen, kapan dateng? Kapan pulang? Peluk segenggem arep ku semai segale imaji yang terus lari sampai sepi ne ilang dari ari-ari yang lah kek mati, serentak kek mekar e lalang di musem ujan ni, kapan dating? Kapan pulang? belay mesra kelinci-kelinci yang alus bulu e, yang tebel bulu-bulu e nutop muka e yang cakep, atau malah cumbu mesra arti dari segale keneg e jalen yang bawak kite ngulek

Ume yang dek subur tesiram ujan, mulai tumbuh mekar kembang-kembang kemunting ngundang segale madu ngiler gara-gara wangi e kek bagus warna kembang e. Burung kutilang pon lah nyanyi dari pagi tadik, sambut ari ne, besukor kek anugerah Tuhan, ngucap segale doa untuk Tuhan. Ku, ku agik disini nunggu ka, nunggu segale yang ku neg, yang ka taut u ape.

Ari Lah Dalu

Minggu, 10 Januari 2010

Dak agik ku kejer bayeng-banyeng e mentari yang semakin jauh ninggal bumi ne, dak agik ku lari nyarik adik ku yang senyum e ngalah-ngalah budak bini kemaren, dak agik ku berik ati ku kek urang-urang yang bekelumpuk neg nyarik kulat kukur, dak agik kawan dak agik. Cukop lah sekali ku ilang piker ku ilang sadar ku dari muke-muke urang dek bemuke, biak lah ku jauh dari ape yang ikak bilang sinar ape yang ikak bilang ari. Ku tau ari kate ikak ukan ari kate ku, sinar kate ikak ukan sinar bagi ku, yang jelas ari kek ku ne deket sedeket mate ningok idung seakrab cempedak kek nangkak.

Ku ge ningok mate yang maen mate ke arah satpam-satpam pasar, ukan malaikat dunia ne yang ngerase dirase, ukan pagi-pagi yang disambut urang di TPI, ukan ngerik untuk bagun urang tiduk yang tiduk e tiduk mati, segale tu logika, yang kite padu kek segale tuntunan kite, segale tu jalen, yang mintak segale piker kite, pas disimpang, pas dijembatan buruk.

Atau malah mimpi urang-urang yang idup e penoh kek segale duse, takot tiduk dek bangun agik, takot kek kiamat e dunia ne. entah lah carik sendirik-sendirik ape yang ikak tanyak kek ati ikak, jawab sendirik-sendirik pe yang neg ikak jawab kek ati ikak, yang pasti kite dikubur kelak sendirik, bawek duse sendirik, ngerase sendirik.

Ngarep

Ade arie kelak burung-burung be bunyi kayak Ababil yang siap di ates kepala, ape yang ku buet ? Bejuget diates awan yang makin ari makin item, belari kayak semut yang neg nyebrang laot, ngerabek selak e ati ne yang makin tenggelem, pas tu tejadi jatoh lah segumpel es dari langit, urang-urang pon ngerik kayak sangkakala disebu kek malaikat, ape yang tejadi? Dimane mimpi? Ape arti ni? Ku cuman budak yang neg idup kayak urang normal, neg jadi arti tiap jengkel kaki ku ngelangkah.

Cemtu pon kembang kedebik, bagus pas mekar-mekar e cikar pas pecah bueh e, tapi tiap ari nya mekar, tiap ari pecah bueh e, sampai semot-semot pon dek tau ninggal bateng e, perbak tiap ari mutek bueh e, malah kadang budak-budak pulang dari kulong galek maken e. Kemane agik ku neg ngerik? Suara lah parau ari lah malem, sing lah dateng pagi lah ilang, Ape? Embun? Jangen tanyak agik arah e.

Akek antak pon marah. Utan lah nangis nyarik anek-anek e yang pindah dek de agik di kampong, ikan tepalak lah pindah idup e di kaca-kaca urang kaya, kelik lah ilang di lelap belakang umah lari ke kolam-kolam semen yang penoh kek zat-zat kimia dari segale zat, sape peduli? Dimane harge e tiap-tiap dari kebennya? Yang ade ge banyek utek-utek urang ketawak ningok nasib e, banyek urang nyukur idup e, banyek urang nutop mate ngingok tingkah laku e, tu ukan masalah! Kebajik ya lah! Agik lah!

Pagi Dek Be Embun

Ape yang kite carik? Tekesep-kesep di utan nebeng kayu pelawan, sampai dak neg agik kulat pelawan tumbuh, begagit kek segale sangker kerengge, sampai langok tepatong ningok muke e, Lalu laleng didepan umah, sampai dek keliet agik jauh paser kulong depan umah ari pon lah berubeh, siang jadi malem malem jadi siang pagi jadi item embun jadi areng....

Jangen tanyak kek ko agik, anggep lah ku lah dek de agik, pegi kayak awan nyair jadi ujan, dek jadi embun yang ditunggu-tunggu segale urang-urang. Ukan cahaya yang mulia. Mulia ari mulia waktu.

Ku lah dek tau agik jalen ne, simpang e lah kebanyek igek, kayu yang ku pigang pon lah ilang, dimane are pelawan di daerah ni? lah banyek ular sabek  mati dikulet urang di jadi tas, lah benyek buaye-buaye lari kedaret, kayu pelawan e dek be bekas dek be warna.

Ka

Senin, 04 Januari 2010

Arti ka…, lah kayak daging yang muat tulang jadi makin kuat, buat ari makin besinar dari malem sampai ke pagi e, sampai ku sadar ka lah kayak bagian dari mimpi-mimpi jalen ku, yang terus harus ku jage kek ku tunggu. Ku jage dari segale kutu-kutu yang terus maken buku-buku, dari virus yang ngantem file-file dikomputer P3 ku, walaupon ku harus nunggu hari yang ku tunggu dateng untuk bawak ka ke ko seutuh e, ku tunggu waktu Allah merestui kite untuk trus besatu. Walaupon sekarang ka ukan punya ku, trus ku bearep ade e jalen ka untuk ku.

Karena ku yakin ade jalen yang libar, selibar bandwith e FO, secepet lari e topi mirah, sebagus e GUI.

Sebab kesederhanaan ka sentuh ati ne, sesederhana Terminal, sekuat bin, seindah e rpm, sepinter e vi.

Untuk kawan ku

Kelak-kelak e, malem kite rase kayak awan yang terus ngambang, trus bateng-bateng cuman jadi hiasan 3D yang nyamen diliet, cemtu ge urang-urang deket-deket kite, berubeh warna mata kebennya jadi item penoh kek bebulek e, Ape yang ku berik kek ka dunia? Dak de rupe ka yang pacak ku gambar tentang ka, dak de maya yang mengilhami nirwana. Ku cuman pacak bilang "yang neg tejadi, tejadilah" untuk segale cerita.

Cemtu pon pas kembang-kembang laleng lah mulai kering, ku hanya ningok mekar e, dak pernah ngerase wangi harum dari puteh warna e, atau ningok ketawak e pas terbeng e nyebar bibit-bibit di angen yang panes e nusuk mate, malah kayak dak de tenage neg ngambik sikok bijik dari yang terbeng-terbeng to untuk ngisik tanah ku yang lom subur, ape arti ku mentari? Panes ke ngelemah ku dari segale jiwa kek ati ne, ngape dak kuat nafsu ne nanggong rase rindu yang terus terase diati ne?.

Ku tau ka pon tau sayang, ka tau ade segumpel emas yang ka tinggal untuk buet jadi perhiasan paling mahal yang ka buang di gelap e malem sampai jam yang dek ka inget agik, pas urang-urang kebun dek sadar agik arti e idup, sampai pulau-pulau kecit pulau seribu tenggelem ilang ditelen ganas e idup, ku tau ade sinar dari sudut mata e lukisan Leonardo da vinci yang buat mata e terus ningok e sampai dek pacak bekedip, sambil mulot terus ngerameng dari bagus e. trus untuk ape warna-warna di idup ne?

Tinggal segudang mimpi yang ku tulis di kitab-kitab tua, buet resah ati untuk dibace terus e dak de arti e untuk budak-budak bujang.

Lah ku tebar duri-duri di segale jalen ku

Minggu, 03 Januari 2010

Dari mulai jiat e muka sampai dek ngeretak apalah ari
Ape yang kudapet?
Duri-duri e ngentem kaki ne sampai lama dek pacak bejalen
Nikem ati ne sampai nangis pon dak de agik gune e

Ku ganti nebar segale cinta kek kelembutan di tiap angen yang ade deket ku
Ku hias kek segale seni yang ku tau
Warna e pon paling bagus diliet segale mate urang
Dek pandang bulu
Ape yang ku dapet?
Segale tu kalah kek nafas e urang-urang munafik
Urang-urang yang utek e dek pernah di cuci
Malah ku tebuang jauh dari jalen ku

Ku cube pasrah
Diem dek begerek kayak urang-urang yang gemok badan ne
Berarep ku ge pacak gemok kayak tu
Ape yang ku dapet?
Ari beganti ari utek makin terase mati
Badan mulai terase ade penyakit didalem e
Sampai mati suri due kali

Trus
Ku neg cemane agik?
Lari salah diem pon salah
Jahat mati baek mati
Ape segale ni mimang jalen
Ape ku ne dak jadi kayak ape yang ku neg
Lah nua lah, umor pon lah tua kek di buet maen-maen
Ku ge neg lah ngerasa idup ne bener-bener idup
Kayak yang lah kuliet

Ape dak pantes?
Trus kalok dek pantes ngape ku disini
Ngape ku agik ade
Ku lah dek tau agik lah bingung e
Neg marah ge marah kek sape, ngeruce kek sape
Badan terase kayak paser di pinggir laot
Terus disiren ombak ketengah kek dikit-dikit tenggelem
Kayak pulau yang digalik paser e nunggu waktu e bai ilang tenggelem di tengah laot

Kemane embun-embun ne ilang

Sabtu, 02 Januari 2010

Dak bebekas dingin e di daun-daun lalang ne
Lah jauh ku bejalen nunggu nyarik hawa e
Dari Lubok sampai Payak Benue
Dari Mapur sampai kemuje
Padahal lah kutingok senyum e kemaren
Ngambai tangan e kalok nya lah neg dateng

Ku ngelamun sebentar
Pikir apa agik yang ku gawe udeh ne
Jauh sampai teinget muka mak pas nangis
Dek sadar ku ge nangis
Kerasa jatuh he aik mata ne dipipi ku

Kulintang pulang kulintang dateng
Kulintang terbeng jauh di genggem
Ilang lenye tinggal sekelumpok perbak
Tengah beradu merayu burong perit laen e
Perincek pon dek agik bebunyi di sebelah kiri ku
Dak neg agik angen maen kek bateng kelapa

Dek tau ngapa lah
Ari pon lah mulai siang
Lah mulai nunu belukar bekas ume mang bujang ne\
Kaki pon mulai merajuk ngajek lari
Jauh dari embun yang lah ilang
Dari dingin e yang cuman pacak ku keneng

Entah lah
Ade ari ade masa
Kite cuman manusia yang bute kek jalen idup ne
Cuman urang yang bejalen lalu di idup ne
Moga bai do'a-do'a kite tekabul
Diterimak kek Tuhan segale sujud kite.

Sejauh mane ati ne pacak nahan

Sekuat ape badan ne pacak migang
Pas ngerasa lah dapet, tetep bai kayak e mudel ukan nasib dirik
Ukan untuk dirik
Trus cemane?
Masak dari duluk cuman jadi tukang mimpi
Cuman ningok kek nahan ati

Sejauh mane ati ne pacak betahan
Sekuat ape badan ne pacak migang
Peduli kadang malah kayak racun yang kek bunuh badan
Ngeloh malah tambah jadi ngerusak ati yang lah rusek
Nangis? Tambeh kayak urang budu yang dek de tujuan ne bejalen

Trus
Sekuat ape badan ne pacak migang
Sejauh mane ati ne pacak betahan
Disamping mate ne ningok kanan kiri yang mulai ngerase dak sesuai
Jauh dari pandang e urang yang pacak mandang

Mimang mawar to harum sesuai kek penunggu e
Angen digunung to sejuk sesuai kek tinggi e
Tapi tinggi kek penunggu kan dak terus-terus sesuai untuk di adep
Malah kadang lah diadep pon dak sesuai harum kek sejuk e

Entah lah
Ku pikir-pikir duluk
Banyek urang dak beruntung dari pada urang yang beruntung
Banyek urang nangis dari urang yang ketawak

Kadang e idup

Kadang e idup nyuruh kita sabar lebih dari kesabaran kite
Sampai pecah sabar to di dalem badan
Belambur keluar dari badan
Jauh akhir e terbeng ke langit

Kadang e idup buat kite ketawak
Nyuruh kite sembunyik dari ati kite
Dari masalah-masalah yang dak pacak dipecah
Sampai nangis pon terase dak de gune e
Sampai mati pon males neg dateng
Cuman nunggu ari beganti jam, jam pon beganti waktu

Kadang idup malah buat idup
Nanem bateng-bateng yang kuat untuk idup
Kuat untuk bediri dari cerita e idup yang dak de betuan
Dak de mimpi-mimpi pas tiduk di dalu e malem

Tapi kenyataan ne
Ade nyek yang idup e trus di tengah-tengah laot yang lepas
Pecaye kalok idup ne mimang harus tetep ikot terus
Sampai bates dari idup abis dek pacak agik diliet kek mate

Ade mbah mi yang terus senyum ngeliet idup ne bejalen
Trus belajar dari tiap langkah-langkah e idup
Sampai kembang-kembang jagong pon kering
Malah sampai pulang e agik burung yang lepas dari genggem e

Agik tinggal timah hau-hau dipaser yang entah kapan jadi berisik
Sampai pacak naek SN e
Pacak untuk dicarik agik kek ngisik ari-ari yang duluk ramai
Dari umong e urang-urang yang pernah ade

Idup kadang mimang lebih susah dari mati

Trus nyiksa ati yang semakin tua
Semakin dek de arti e di depan urang-urang
Dak di anggep dirik ne
Ade ge dek pengaruh, dak de ge dek pengaruh
Tu ge ade sebagian ne nganggep badan ne amak
Kutu-kutu yang dek neg dideket kek nya
Takut kenek kerunet kulit kepala e
Muat nya tembeh nua garuk-garuk kepala
Atau malah kayak asuk
Najis untuk dipegang, haram dimakan

Mati pon kadang lebih bagus dari idup
Ditunggu lom dateng di arep-arep lom dateng
Nangis, ngerik, ketawak, dak de agik arti e
Depresi utek ne dari segale jalan yang lah diliwat
Makin ari makin dek tau arah e
Malah pas dipiker-piker tambeh besak bai item didepan jalan
Makin gelep dak begambar ape-ape
Buat ati ne makin takot
Makin gemeter neg ngelangkah kaki ne
Makin kecit jengkel jalen ne

Sape neg peduli kek idup ne
Urang yang bace ne pon paling cuman ketawak
Malah ngebudu-budu badan ne
Makin kayak e budak kecit piker e
Padahal nya dek tau sesusah apa ati ko betahan kek idup
Betahan bilang kek ati ko ade harapan didepan
Ade jawaban didepan
Walau utek ne kadang e dek yakin
Tapi terus diyakin-yakin
Sape kek tau cemane rase ati ne
Bukan masalah cinta
Bukan masalah miskin
Bukan masalah budu
Tapi
Lebih dari tu
Lebih dari yang pacak ka itung kek tangen ka

Ku sekarang ne mimang sendirik
Bediri sendirik jatoh sendirik
Pegi sendirik keseset sendirik
Ketawak sendirik nagis sendirik
Entah mati e sendirik ape dak
Ku dak tau

Ku kurang ngerti kek rasa e betunang

Kate urang-urang
Rase e kayak di belai lembut e wangi kembang mawar
Kalah seneng e pas hari raya dateng
Macem ketemu kek kawan lame, kawan-kawan sekulah duluk
Malah kayak nyamen e angen di pantai Tuing pas waktu surut dateng

Entahlah

Tunang to dak same kek bini
Yang pacak bener-bener dipecaye
Nerimak segale ke kurang e kite

Ku piker hal-hal jiat e
Yang ku rase kayak “gas emisi CH4” yang terus ngancem
Walaupon “senyawa saponin” pacak neken ade e zat to
Atau kadang-kadang kayak isik dari "Timaeus kek Critias"
Yang terus bai jadi tanyak e urang-urang di dunia

Entahlah
Mungkin ku bai lom tau masuk daerah tu
Lom jauh atau mudah-mudahan dak kek jauh masok ke situ

Bagi ku
Cukop ku simpen di ati
Dak usah banyek ulah
Cukop sekedar ngisik jalen yang biru ne
Yang cuman hanya sekali ketak ku liwat sini

Di tengah e lelap belukar, di dalem e kulong ijo

Ku tinggal segale e
Dari ngeliet besak e ikak tumbuh kek bekembang
Kek segale siang malem e yang ade disanen
Ukan mimpi ukan bebulek
Ku pegi makin jauh ninggal segale yang ku liet pas kecit
Keseset di tengah-tengah urang-urang ketawak
Te empes di dalem e laut bedukang
Di liet item segale raut muka ne
Dak kek kayak urang agik
Jauh dari sepradik dari adik kek akak ku
Sampai anek-anek ku ge nanyak kemane sebener e piker ku pas duluk
Entah salah sape ku ge dak tau
Dak pasti kayak ngitung jengkel arah langkah yang ku itung

Ku teros lari dari kearah yang entah ku lom tau pasti e
kek segale bahasa e, segale tingkah laku e
Semakin be rubeh-rubeh
Ngajak ngambar ari ne ngajak ngebet tali ne ke tiang gantong
Trus tejadi sampai ku dak tau pasti e
Entah item atau puteh bersih kayak ubi dikelos

Dak kek ku puja kayak urang seneng kek budak bini pas seneng-seneng e
Dak kek ku sayeng kayak urang sayeng kek anek e
Dak ke ku ngulek kayak gatotokoco kate urang jawe
Dak kek ku yang dak ku neg

Paling kelak e kembang-kembang kemunting beganti jadi kembang-kembang mawar
Yang makin nyamen diliet nyamen ditingok
Atau malah tambah parah
Kembang kemunting berubeh jadi paser isep
Yang siap maken segale yang pacak diisep
Bekawan kek bauk solar kek oli bekas TI
Yang dak kek abis te burai nguas cuman hanya kenak mentari
Cuman kenak cuci dari tangen-tangen yang kutor
Tangen yang takot miskin takot idup
Takot kek segale yang nya takot