Ku Ukan Urang Baek-baek

Minggu, 11 Juli 2010

Aok
Ku ukan urang baek-baek
Tapi ku cuman berusaha untuk ngindar ang jiat sepacak ku
Semampu ku yang pasti ade bates e
Semue kurase tau tu

Sebab
Kadang e jalen to maksa untuk jadi urang jiat
Yang dak pacak diliwat untuk di ilak
Kadang yang jiat to nawar segale yang manis-manis dimate
Sampai lidah ngerayu utek untuk ngikot
Ade masa e kadang kite harus jiat
Dak pacak dak untuk jiat

Jadi
Selame pacak di ilak di ilak duluk
Ku ge ukan urang baek-baek
Selama pacak di tolak di tolak duluk
Ku ge hanya manusia biase

Cuman pacak ngumong
Mudah-mudahan dak ketemu yang jiat-jiat
Biar ku tetep dak jadi urang yang jiat
Biar idup pacak mati sambil senyum
Sepatau e surge agik nek nerimak tingkah ku.
Yo mudah-mudahan bai.

Ku Baru Ngumong Kek Die

Entahlah banyek semot di utek e
Ngumong pon rase e dak nyamen
Dak kayak dulu
Malah kayak e semot e di piara

Cemane agik
Disemprot kek miyak tanah semot e sembunyik di utek e
Di bunuh sikok-sikok ge cemane bareng e didalem utek
Atau malah kayak e imang didiem bai
Biak beranak sampai cucuk e jadi atok-atok

Mungkin di biar bai ok?
Sampai utek e leteh ngerase dikerunet-kerunet semot
Sampai embun-embun pagi dek agik inggep di paser-paser
Sampai panes e paser dek neg ilang sederajat pon

Dari mane nya dapet semot to?
Ape mimang dicarik ok?
Biak nya pacak buet sareng semot di utek e
Atau dari utek urang laen yang lepas lari ke utek nya

Entahlah
Yang pasti ade semot di utek e
Harus e dibuang jauh-jauh

Budak Kecit Rindu Kampong E

Minggu, 06 Juni 2010

Belajen jauh dari umah
Bmawek segenggem ati
Segenggem mimpi
Jauh sampai dek ketingok agik langkah e
Sampai urang-urang lupak muka e

Bejalen nya terus jalen
Segenggem ati nya ajek senyum terus sampai leteh
Liwat lelap-lelap kek belukar yang dek kek nya kenal
Maken segale yang dek nya tau
Bejalen teros
Sampai ati nya leteh

Segenggem mimpi nya pigang terus sampai penoh warna e
Sampai mak kek pak e pecaye kalok idup to hanya untuk mati
Berani untuk iklas segale yang keliet

Nya pon tau
Cemane bagus e ijau aik kulong-kulong di depan umah
Nya pon tau
Indah e senyum dewi pas liwat depan umah
Nya pon tau
Nyamen e lempah kuning ikan aron yang dimasek kek mak

Namon
Idup harus tetep bajalen
Harus pacak beradaptasi kek jaman
Jawab segale tantang e masa
Untuk betahan idup sampai mati

Bener kate urang-urang sufi
"Kalok ka lah berani nyayeng sesuatu bareng
Ape pon bentok e, Maka ka harus berani untuk ditinggal bareng to
Paas ka sayeng-sayeng e, maka siap-siaplah ka untuk iklas
Pas bareng yang ka sayeng to pegi ninggal ka
Pas waktu ka sayeng-sayeng e"

Mungkin Kek Mungkin

Mungkin cinta to kelak berubeh jadi cita pas lah kawen kelak
Mungkin Besok ade bidadari nyelimut ati sampai ari dek agik mati
Mungkin kembang-kembang warna mirah kelak berubah jadi biru gara-gara kenak asep e semelter
Mungkin kulong ijo ne kelak kering pas musem panes waktu lah kek kiamat
mungkin ari to 25 jam sehari ukan 24 jam pas urang-urang lupak gitong e

Mungkin kek mungkin begasak jadi berubeh jadi seandai, jika, upama kayak kata e Zainuddin M.Z
Mungkin kek mungkin bekawan jadi bener rupe e Tuhan to nyipta ape ge dak de yang salah pas yang ngerase bener-bener miker
Mungkin kek mungkin kawen trus beranek banyek sampai be cucuk cicet
Mungkin kek mungkin ilang dari bumi trus beganti kek may be
Mungkin kek mungkin segale mungkin kek mungkin jadi mungkin

Ngape mungkin kek mungkin?
Dak pacak ge di ganti aok kek dak?
Dari duluk cuman mungkin kek mungkin bai
Sampai urang-urang kalok ditanyak seneng jawab e pakai to
Sampai jawaban e urang-urang jadi payah dipigang
Mungkin kek mungkin

Sepi

Minggu, 30 Mei 2010

Ni rupe e rase e sepi
Kluntang-klantong dek keruan jatak
Gelisah ati dek tau kenek e
Trus nyarik-yarik dimane arah e jalen
Sepi
Sepi
Kemane ku agik pegi?
Pasar jauh
Laot jauh
Umah kawan pon jauh
Tinggal ku sendirik

Dek terase sampai malem
Pas dingin e angen mulai ngerayu-ngerayu kulet ko
Tambah terase
Sepi
Sepi
Kemane Dewi?
Kemane Eva?
Atau lah waktu e ikak miker ikak masing-masing
Cuek kek keadaan ne
Sampai lupak kek muka ko
Dak keliet agik di selak-selak mimpi-mimpi ikak
Sepi
Sepi
Ape ku ngulek agik ke jalen yang gelep kemaren?
Disanen penoh kawan
Penoh harapan yang pasti ilang
Atau ku betahan kek idup ne?
Biar teros bejalen
Agep ni cuman jalen yang jiat bai
Di Sekian jalen bagus-bagus didepan
Tapi.....
Sepi
Sepi
Sepi
Makin terasa dek pacak ditahan
Makin kuat nikem badan
Sampai pagi pon lah mulai dateng
Agik lah Sepi

Ukan

Kamis, 20 Mei 2010

Dewi-dewi lah dek de agik keliet muka e di depan altar persembahan
Jauh dari sisi yang dek tau arah
Sampai di adep e raje-raje
Dari segale muka-muka dunia yang takot idup

Jangen di ulon budak-budak untuk tau ape yang dek tau
Biaklah ngajar ikan untuk bejalen
Jangen di ajar berenang
Sampai masa e kite liet asel e
Jauh dari mata

Kalok mimang ade ari kek segale ari
Ade jam untuk segale jam
Dak kek sampai kiamat hari-hari ne bejalen
Trus ngarep ari yang dek de untuk bediri
Dia ari yang makin mati

Ukan Malcom-x
Ukan Feodal Castro
Ukan Galileo
Ukan Kahlil
Ukan Siti jenar
ukan Albert
Ukan Akek antak
Ukan Bujang kalok
Ukan Tayayak

Idup trus bejalen
Sampai mati dateng

Pegi jauh tinggal segale yang ade
Tinggal segale yang pernah diliet
Untuk yang baru
Untuk hari yang lom kite tau

Mati e cinta

Sang bayu dateng ngantem segale arti sampai sekarat tinggal bumi
Lanjut ari dari item e jalen yang makin dek tau arah
Sampai langkah-langkah cinta pon pulang jauh dari kata sayang
Murka e raje langit sampai bumi dek agik bemuke
Tande sejuta matie e cinta

Dak kek ade agik perintah e raje akek antak
Dak de agik semangat e bujang antan
Dak de agik warna e gunung tambun tulang

Puteh e paser padi ne jadi saksi
Tempet urang-urang lari jauh tinggal segale yang ade disini
Tangis pon dek agik kek jemput dateng e malem
Sujud pon hanya untuk Tuhan yang tau segale arti
Bayeng-banyeng hanya betahan selintas lalu trus pegi ngikot arah angen
Atau malah tependem di sungai timor
Antara perau-perau karem yang dek tau gambar e

Kembang-kembang mawar mirah berubeh jadi agak keitem-item
Takot ngadep mentari yang mulai nebas klewang e di segale arah
Siap ngantem kulet yang lemah ne
Sampai nafas e dek agik ade di badan
Muka pon dek berupa

Kemane ikak pegi?
Mane mimpi yang ade di ati?
Ape jadi e kalok lah cemni?

Segale yang ade
Mati e cinta di dalem badan
Ninggal serbuk-serbuk mentana yang dek pernah ilang
Siap untuk tebakar nunu segale ni
Kek e langsong pegi

Sejengkel pon jangen deket dari sini
Ngerik-ngerik ngejer mimpi

Jauh

Selasa, 18 Mei 2010

Tinggal bayang yang nyelimut ati ne
Jauh dari mata ukan ati dek seneng
Dari jalen ne ari
Nyarik bener salah e idup
Yang akhir e mati di ates papan meranti
Dek kek pernah pacak diselamet urang

Ikak nangis ge percuma
Bener tu ukan punya kita
Adil tu ukan punya kita

Pergi jauh dari mata-mata yang makin item
Untuk nyarik segumpal warna
Biak idup pacak ditingok urang agak bagus
Dak jadi sampah di dunia
Dek kek pernah pacak pulang

Umah lah dek de agik arah e
Ati pon lah mulai lemah
Tangis dek kek pernah didenger urang
Kata-kata cuman siul e angin yang liwat di bilong
Nama cuman penghias badan bai

Dimane rase?
Abis lah, jangen arep seperadik dateng neg nyelamet
Jangen arep ari neg teneng
Dunia ne ukan punya kite
Ukan untuk kite

Trus, kapan mati ko?
Biar dek agik ati ne nahan tangis dari saket e ari
Siape yang pantes jawab?
Siape yang pantes nanyak?

Sampai lupak cemane ari-ari kecit ko
Tebuang di pulau-pulau antu
Ilang di tengah-tengah e jam
Atau malah ilang dari inget piker ko

Penghianat

Senin, 17 Mei 2010

Payah pecaya kek urang
Ape agik budak yang dek punya prinsip
Dipecaye malah maken ati
Banyek mintak
Utek e kerungkeng

Ku dak pecaye kek sape lah
Ape agik urang yang ukan dari ukuran ku
Dak pacak dipecaye
Jujur pon cuman jadi pemaken kek urang bai
Munuh badan dek miker urang

Banyek malah balek jadi penghianat
Pantes mati
Dek de tempet e untuk didepan muka
Mati lah baru pantes untuk penghianat

Urang to tetep lah urang
Yang susah dipegang umong e
Susah di pecaye

Jangen pernah pecaye kek urang
Jangen pernah
Cuman nambah masalah bai
Mending disimpen sendirik
Walau pon mati taroh e

Sekian

Sekian kek terimakasih
Antara api kek aik to belawan
Antara bumi kek langit to belawan
Jangen ka banteh agik
Meskipon gunung tambun tulang lah dek be utan
Tetep bai belawan
Sampai bujang antan tua kelak e
Tetep bai belawan

Liet lah kayu pelawan to
Mirah bateng e tipis kulet e
Ukan kayu to dak kuat
Ukan kayu to dak tahan
Tapi kayu to ngisik warna-warna e utan yang makin bewarna
Diantara warna-warna kayu idat kek kayu meranti
Ukan kayu to dak kuat ukan

Atau liet lah kawan kite yang lah ninggal di camoi kemaren
Ukan nya dak neg kek idup
Ukan nya prustasi kek idup
Tapi tu lah jalen nya
jalen yang dek pernah kite tau
Kapan kek dimane mati kite

Sekian terimakasih
Jangen dateng agik bawek segenggem tangis ka
Ku lah langok ningok segale ni
Lah dek kawa agik
Cuma ngarep bidadari bai yang mungkin ade
Bawek ku pegi jauh dari tempet panes ni
Mualesss ku lah langok
kalok pon dak de bidadari yang dateng
Entah cemane
Mungkin lebih nyamen kalok mati bai

ku ukan

Ku ukan peramal yang pacak ningok ati urang
Ukan dukun yang pacak segale e mintak urang
Sampai ka dateng ke ku mintak segale yang kudek tau
Ku cuman budak yang gile kek segale yang gile

ka kek ku cuman urang laen
Dak lebih dari tu
Cube ka liet tingkah laku ka
Ka kek ku jauh bebeda
Tu dari segi yang keliet
Ape agik segi yang dak keliet

Item ka to mimang bagus
Tapi kelakuan kan dah mesti item
Cukoplah ka dateng mintak yang ku dek de
Jangen ngarep yang macem-macem
Banyek yang dek beruntong e dari yang beruntong e di idup ne
Jangen ka nambeh banyek tingkah
Cukop disini bai
Ketimbang ku nyarot kek ka
Ke segale carot-carot yang ade

Kembang pasti mati kalok dak dirawat
Kalok ade yang punya yang punya ngerawat e
Tapi kalok tumbuh liar kembang to harus ngerawat sendirik
Jangen ngarep urang laen
Ape agik sampai kek maken kembang laen ne

Idup ne dak de yang nyamen
Meskipon cemane keadaan ne
Kite cuman numpang idup didunia ne
Jangen dak pecaye
Segale yang idup ne pasti mati
Entah kapan entah kite dak tau
Tapi pasti

Kalok ade urang nanyak ko

Kalok ade urang nanyak bilang ko lah mati
Ditimbak belande pecah kepala e taon 1945
Pas waktu lengah ku
Pas leteh ku
Atau
Bilang dek de agik kedenger name ku
Lah lama dek kedenger di bilong ikak
Kalok yang nanyak kurang puas, bilang bai kuat-kuat
Sampai urang to dak nanyak agik

Dak de agik cahaya mulia yang nyinar jalen
Tu cuman menghayal e urang-urang
Hayal e urang dek de gawe laen
Sege cahaya cuman ade di mimpi
Mulia cuman untuk penghianat-penghianat ati

Sampai tahlil-tahlil pon du ucap urang-urang
Tetep bai cahaya dak de mulia

Mending nunggu pagi yang bejanji jatoh embun
Dingin e lebih seger
Arep e lebih pasti
Malah
Kembang-kembang laleng pon makin mekar
Diselak dingin e nya diberik setites embun
Pas panes e musim ne
Di tengah-tengah belukar yang dek lebet
Bekas nanem padi yang dek subur

Burong-burong puyoh pon lak dek pacak mandik agik
Saking panes e paser-paser ni
Dimane cahaya mulia?
Lah ko bilang dak de cahaya mulia kan?
Cuman hayal e urang gile
Cuman hayal e urang yang dek pacak menghayal

Heh, Idup too

idup kadang beputer kayak diates mija monte carlo
Kadang ge malah kayak jalen e cerita sayap-sayap patah kahlil gibran
Yang dek tau arah pasti e
Yang ngumbar segale kecewa ati ne
Dari budu e segale urang-urang
Budu e ningok ku sebener-bener e

Dari segale yang ade
Entah kadang idup bukan idup
Malah mending mati
Jauh lebih damai jalan e ari
Dek de yang dek pasti

Liet bai ku kinik
Tekurung di celak e umong e urang
Di siksa aturan budu urang-urang
Dek de yang mikir
Dek de yang neg bantu
Kalok yang nyumpah banyek
Kalok yang neg ku mati banyek
Kalok yang neg ku dak de dimuke e banyek

Ku lah males jadi gembel macem ni
Males idup hanya jadi sampah
Dek de arti e idup untuk urang
Yang mimang ku tau kebennya ge dak berarti
Hanya gerumbol kutu-kutu pemaken kulit bumi

Tapi cemane?
Ari lah lama beganti
waktu pon lah jadi masa
Klewang-klewang lah diasah siap untuk nebas segale arah
Jauh dari segale yang ade
Minyak tanah lah tumpah untuk ditunu
Tinggal nunggu angin bawek e jadi makin besak

Dendem?
Pasti
Tobat?
Tunggu duluk, siape yang bener siape yang salah
Jalen ne mening kepalak bai
Kalok dipiker arah e
Kalok dipiker jalen e

Tinggal nunggu waktu panen sahang
Yang pernah maken masadepan ko
Tinggal nunggu junjung-junjung tumbang
Yang pernah buet melepoh telapak tangen ko
Atau sampai perit-perit ngerik takot ke kebun ne.

Gunung tambun tulang

Sabtu, 08 Mei 2010

Dari kicau e burung kerakblincong
jauh terbeng di kayu are
Begagit kek due anek e
Trus ngisik waktu ne sampai terbeng e sang mentari
Sampai mulai dateng e sang malem
Maken segale warna yang ade di bumi ne

Jauh keliet dari diret e kayu mendaru di utan to
Dari lebet e bunge idat di pucuk bateng e
Entah kemane arah e
Gunung Tambun Tulang
Jadi impi-impi cerita e urang-urang
Sampai kapan pon

Ku bediri di cabang kayu are tempet burung kerakblincong begagit kemaren
Ningok ke arah keliling utan-utan ne
Makin buet ati ne dek tau arah
Nyarik warna e kembang ketapang yang dek bebauk
Jadi separo e sangker burung

Trus bejalen e ari
Ati ne mulai leteh
Ngarep ape yang dek kenak di arep
Nunggu waktu dak kenak di tunggu
Sampai utek ne merintah badan
Untuk trus pulang ke umah

Atep rembiak di pundok kebun kami

Rabu, 05 Mei 2010

Coklat mudek warna e pas siang ne
Yang terus ngadang ujan jatuh baseh badan ne
Dari panas e ari
Sampai tempet ngumpol pas waktu mutik sahang dateng

Muet ati ne rindu
Lama lah diates dari jaman sahang bejunjong kecit
Pas dewi dateng neg ningok kebun ne
Kembang-kembang mimpi ne yang mulai mekar
Mulai ngelilit ati

Ku liet ular-ular yang ngelingker dikasau e
Ningok kearah tikus yang malu-malu
Lari kebaweh tungkuk mak tempet masek lempah daret
Kadang malah lari keutan ngikut gerek e burung punyoh
Maen-maen kek anek-anek prit yang agik bebulu jarum

Ku liet cecek yang sembunyi di selak-selak atep
Begagit kek anek e yang agik kecit
Ngintai nyamuk yang kenyeng maken dareh ko
Kadang malah dek sadar jatoh kebaweh
Pas di papan kayu mearanti pak
Trus cemtu trus belalu

Ku liet nyamok takot ningok muka ko
Ku tamper dek kena lari keates
Di incer cicek yang cakcak dek tau kek nya
Mulai ngerangkak kearah sudut kasau
pas di tiang segitige e

Atep e pon berubeh
Dek tau ko warna e dek agik coklat
Kering e jadi layu untuk diliet
Kasau e penoh kek nduk-nduk kecit-kecit
Ular-ular e dek keliet agik tinggal kelos e bai yang ketinggel
Nyamuk lah dek de suara e
Cicek yang kecit kek nduk e pon ilang

Tinggal ko
Rindu sendirik inget muka e dewi
Bayang-bayang e dewi
Yang entah agik ketemu entah dak
Sampai ari pon lah mulai gelep
Perot lah ngamok-ngamok
Ku tetep nginget muka dewi
Pas senyum ningok ku
Yang dek tau kapan agik pacak ningok e

Miak Nama E

Selasa, 04 Mei 2010

Di selubong e senyum e ka
Samping rona jiwa yang buet ari ne makin dek karuan
Indah selimot jilbab putih to
Muet ati ne makin dek tau arah

"Miak nama e"
Sempet ku denger dari kawan akrab ku

Kembang nundok malu-malu
Lah kek layu keliet e
Entah takot kek banyek e madu
Atau yang laen ne

Dek nek ku jadi kisah keyak buku Critias
Atau Timaeus yang mening kepalak
Dari indah e hiasan dunia Mu
Indah e ningok rona ka kembang

Kembang nundok malu-malu
Lah kek layu keliet e
Entah takot kek banyek e madu
Atau yang laen ne

Yang pasti ati ne lah kenak api e rindu
Guncang segale isik badan ne
Makin buet ari-ari macem kek penoh wangi e mawar
Yang dicampor kek melati puteh

Ku lari ke kulong ngarep umah
Bekaca ku di aik liet muka seneng
Entah ku dek tau ape yang tejadi
Ape yang kaki ne langkah selanjut e

Kembang nundok malu-malu
Lah kek layu keliet e
Entah takot kek banyek e madu
Atau yang laen ne
Buet ati ku rindu
Warna indah ari ko
Miak nama e
Budak kampong sebelah

Mutu Kabla An Tamutu

Kamis, 29 April 2010

Sabar cinta, Sebener e Jam to pasti ganti masa
Biar segale gunung-gunung di penoh kek sejuta mekar e bunge Edelweis
Besame-same kek cumbu rayu e kupu-kupu
Bekawan kek ari sampai jalen dek agik penoh kek simpang
Kek mazhab-mazhab cinta sebener-bener e cinta
Yang imang untuk pencinta

Ikot bai kek terus pecaye
Pas ari lah kek magrib
Laot pon nyanyi lagu-lagu becerita
Beriring lagu dari hempes ombak kek ramai e daun kelapa
Penoh warna
Melodi lagu-lagu cinta

Ukan idup kayak jalen e idup e Cupid
Atau Aphrodite untuk dianggep emak e

"Mutu kabla an tamutu"
Untuk segale pencarik makna
Pencarik arti di tumpuk-tumpuk debu-debu
Dek hanya sebates lintas lalu
Sekecap lideh selintas bayang

Demi nama e bunge mawar sedudo
Dari harum e
Dari indah e
Sabar lah cinta
Ade segudang jalan penunggu
Ada segenggem harapan
Yang kek jadi emas di pas tiduk leteh ka
Jadi embun nyiram bunge lalang di musim panes

Pasti indah hai cinta
Lebih dari indah e ape yang pernah ka liet
Dari sahdu e malem-malem dingin
Sampai imang pantes untuk di rindu
Dinanti
Diyakin sebagai jalen yang tetuju

Entah Cinta Entah

Selasa, 27 April 2010

Masak ku sampai ngilang di dalem debu-debu jalen ne untuk cinta kek ka
Dari bagus e kedip tiap jalan ka
Manis e senyum indah rona jiwa ka
Penoh kek bekorban yang harus ku adep untuk liwat jalen yang ka tuju
Sampai ilang di ates ditelen tinggi e gunung ngalang mata ne ngeliet e
Dari jaman akek antak sampai jaman waw duluk

Cinta kadang imang harus ngilang di debu-debu jalen
Yang jadi bukti kotor e cerita atau mungkin indah e nuansa
Maksa ari jadi malem kek dingin yang beku ati ne
Beku  jiwa yang lah kek mati
Lah kek beku
Ilang
Kek mati

Arti  e makna ku harus tetep berjalen
Entah kinik atau kelak
Yang pasti hari ne trus bejalen tinggal bayeng
Penoh kek bebulek
Yang wajib untuk ditinggal kek dibute

Cintai kadang imang harus bunuh sepi

Cinta Tu Hai Adek

Cinta ni oh adek hanya sebates kawan bai, sebates tau ku kek ka
Jauh dari kata cinta oh adek
Ade bates yang harus kite tau oh adek dari arti cinta dimasa kite
Dak sebates ni oh adek biarlah trus macem ni, sebates tau ku kek ka
Dek pantes kite tebar rasa ni kek sesama kite
Ade Tuhan yang punya segale cinta
Yang lebih punya hak untuk rasa cinta

Cinta tu ukan punya kita oh adek
Ade Allah diates segale e
Yang punya arti idup kek yang punya cinta ni
Segale yang indah ni oh adek, hanya nafsu manusia
Hanya cuman bute mate kite untuk ningok ari-ari yang bener-bener ari

Jangen jadi abu hai adek, dari api asmara yang membiru
Untuk surga oh adek ayo bejuang lawan nafsu
Biar kite oh adek trus tejage iman kek ahlak kite
Biar indah oh adek dunia dimate kite

Selamat tinggal oh adek kalok ati ka tetep dak berubah
Care pandang penting oh adek bepikir tiap jalen kite
Ati ku hanya ati manusia yang lemah oh adek kalah dek berari ngalah
Menang dek berarti menang
Banyek agik ari yang kite temu oh adek samapi sini bai cerita ku di ati ka.

Dunia Buangan

Entah sampai kapan ku betahan dari dunia ku di buang
Trus ku mintak-mintak rahmad e Tuhan ku dari tiap jalen e tempat yang mengasingkan badan ne
Sampai badan ne dak kuat ntuk lari dak kuat nangis untuk ningok muka Mak kek Pak

Jauh dari jalen cuman kedenger bisik-bisik e suara Pak kek Mak ku
Nuntun jalen ne yang tambah mirah tambah ku mintak arah
Panggil lah ku kearah yang mimang jalen pulang ku untuk dapet rumah ku surga ku
Biak ku liet senyum e anek bujang ku yang baru nek besak

Jauhlah dari berkibar e bendera-bendera berhala dari sudut ujung jaman ne
Biar ku pacak bawek Anek ku surga, bawek Bini ku ke adep Tuhan ku
Walau ku tau ku dek pantes untuk surga Mu
Biak lah ku mintak sedikit dari segudang rahmad Tuhan ku
Dari gelisah e badan kek jiwa ku
Dari jiat e mimpi malem ku

Dak de juged-juged di depan umah untuk kami biak jadi sahabat diantara umat
Diantara segale urang-urang yang beriman
Kek jadi pengikut imam-imam yang idup sebelom kami
Sebagai pengikut umat Nabi Muhammad S.A.W

Dak de tangis laper e perut anek-anek kami
Biak pacak kami nurun keturunan yang kuat kek sehat
Untuk pacak ngadep ari yang makin siang
Biak kuat ngadep panes siang e
Kuat ngadep dingin pagi e

kate Urag-urang tue Duluk

Senin, 19 April 2010

Idup ne kadang kayak listrik lampu Disel
Cuman ade 2, 0 kek 1, idup kek mati
Meski kadang kite lah nyube untuk melibar arah e biar ade kemungkinan
Tetep bai, malah kadang tambah parah

Salah kek bener
Kaya kek misken
Nangis kek ketawak
Cemburu kek rindu

Dari Permis sampai Belinyu
Dari Kubak sampai mentok

Kemane agik lah idup ne bawek ari
Kemane agik kaki ne ngikut angen ne
Badan pon lah mulai tua
Dunia pon lah mulai berubeh

Tinggal kembang-kembang asik-asik yang mekar nunggu ko
Nunggu ari makin bencik kek ko
Dari segale arah e

Atau mungkin ade arep yang laen
Kayak umong e urang-urang tua duluk
Kalau idup to ade takdir e
Kalau jalen to ade buntu e
Kalau tenage to ade bates e

Dek Seputeh Awan

Sabtu, 03 April 2010

Ku deket ka dak retak

Walau kadang e ku trus nyube untuk deket

Biak ku tau ape yang mesti ku gawe

Cemane care ngadeo ati ka

Bukak dak e jiwa ka

Untuk ku

Ku jauh ka nyarik

Meskipon ku mulai nyusun ari-ari yang laen

Mulai lari jauh dari depan ka

Biar ka teneng kek segale idup ka

Ku rayu ka marah

Meskipon sebates kawan ngerayu kawan

Meskipon kayak bintang nyube nyinar e bueh kelubi

Tetep bai ka marah

Ku diem ka nanyak

Sampai kayak budak bini rindu tunang e

Ku lari ka kejer

Walaupon lah jauh kaki ku pegi tetep bai

Ku nangis ka diem

Didepan ka sekalipon ka diem

Ku ketawak ka merengut

Pas waktu kite same-same bahagia

Atau mungkin ku dah dakpantes untuk tu

Ku senyum ka merengut

Dari hari ke hari

Kite idup cuman numpang kek Tuhan

Ku ge manusia

Penuh duse

Dak lepas dari marah

Kalok cem ni terus,....

Mungkin kelak bailah kite bekawan

Kelak bai kite nata ari same-same

Kalok Tuhan imang beri jalen kek kite

Pucuk Idat

Kamis, 11 Maret 2010

Dari warna mudek e
Dari gumpal ranum e
Dari bayang bunge e

Biaklah terus ade, biaklah terus, Biaklah
Ku neg mutek e untuk lempah daret mak ku
Untuk rampai
Nambeh wangi, nambeh rase e

Pucuk idat
Pucuk idat
Pucuk idat

Jangen berenti bebunge
Jangen berenti bepucuk
Walaupon musem makin dek nentu
walaupon musem terus buet bateng-bateng ne layu
Teroslah idup
Untuk ngisik lagu Bangkek ne

Jangen pernah ngerase ka sendirik
Ade bateng karet kek bateng sawit di pinggir ka
Banyek kerak duduk ngeramai untuk kawan begagit ka
Jangen ka pegi dek milang-milang pucuk idat

Biaklah untuk lempah daret mak ko
Untuk rampai
Untuk maken siang ne untuk laok pak.

Tunang Ku

Kapan agik neg kesini sayang?
Lah ku carik ape yang kemaren ka carik
Lah ku siap ape kemaren yang ka neg
Tinggal ka ngumong bai jalen ne lah ade
Tinggal ka neg dak e bai
Tangen ne lah siap

Jangen miker ape yang lah dak perlu dipiker
Jangen pecaye apa yang dak perlu dipecaye
Idup ne harus tetep bejalen
Harus tetep kite saling pecaye

Agik ade ari bisok kek kite
Agik ade masa depan e kek kite

Ayo lah sayang
Ka jadi tunang ku bukan jaman e bujang pas musem ngelimbang
Bukan jaman e TI baru jadi dibukek urang
Bukan jaman e sawit pas nanem

Ayo lah tunang
Ku disini nunggu kek gitar tua ku
Nunggu ka bawek segenggem kembang mawar
Nunggu senyum ka ngulek kayak senyum ka yang duluk

Ku tunggu ka disini sayang
Kek lagu-lagu yang terus ngerayu jalen ari ne
Kek suara mesen aik yang dai pagi tadik ngerik manggil-manggil name ka

Datenglah tunang
Pagi lah dateng
Embun lah ade
Mentari lah dak agik ngerucu kek kite

Datenglah sayang....

Kembang Kemunting

Jumat, 05 Maret 2010

Trus bai bekembang dek ngikut musem
Dek ngikot cuaca ari
Tros bai bekembang
Magi bueh - bueh e kek burung perbak yang kelaper
Yang semakin ari semakin susah idup

Dari mirah jambuk warna e
Keliet indah e pas abis ujan
Trus tersenyum tiap diliet madu madu yang dateng
Betahan kek cerita idup yang semakin susah
Semakin kersang e paser - paser puteh ne
Yang trus ngeluar hawa panes e

Dari mirah e bueh mudek e
Dikeluarnya gambar yang ditingok dak de masalah di ari- ari e
Di tiap langkah proses idup e
Yang dek pernah kite tau cemane jalen e

Ku trus liet kembang kemunting di pinggir umah ne
Kecit bateng e, kuat kayu e
Manis bueh e, cikar kembang e
Lurus tumbuh e, merekah bueh e
Trus ku liet
Sampai ku dek pacak agik ningok e
Dari jauh e nya lah ku tinggal
Jauh e ari bawek ku pegi
Meski ku yakin
Kembang kemunting pinggir umah pasti pacak trus idup
Trus senyum ngadep ari-ari yang sepi
Yang kayak e idup didalem kota mati

Sebagian Kite

Ade yang begawe di TI
Ade yang begawe di laot
Ade yang begawe di kebun
Ade yang begawe di ngelimbang

Pukok e entah ape yang kite gawe
Ape yang kite rase
Ari trus bejalen
Dek nunggu kite untuk bejalen
Trus dak kek nya ngumong kek kite ape yang kite rase

Ape pon yang kite buet
Apepon yang kite rase
Pukok e mati tu pasti dateng
Mati tu pasti dak milang duluk kek dateng

Cemane pon kaki ne ngelangkah
Duse tu pasti trus deket nek lengket kek langkah
Pahala trus liwat mintak di ambik untuk dipelok
Sampai akhir e kite tau sama tau
Idup ne dek lebih dari jalen ape yang tujuan kite

Inget lah

Kamis, 14 Januari 2010

Inget lah,...Ku pernah jadi bagian ne dari bumi ne, urang yang pernah idup di bumi ne, walaupon tinggi e angen yang bawek awan sampai ke langit, walaupon kembang-kembang lah mulai layu pas ari mulai pagi, tapi ingetlah.. Ku pernah nulis di kertas putih jalen idup ku, pernah muat ari-ari ku kek segale tawak kek tangis e badan ne.

Inget lah, Ku pernah ade di depan muke ka, pernah ngumong akrab kek ka, pernah nyusun same-same cerita kite pas tu, pas urang-urang tiduk males bangun, pas gelep e malem mute mate langkeluit, pas marah e pak Azhari sampai muat piker ne terus ngeneg jiat e jalen ne.

Inget lah,... Ku ne anek urang yang beda care bahasa kek tingkah e, beda care ningok kek miker e, beda care e kite...Inget lah pas kite denger same-same tangis paser-paser puteh ne di panes e mentari, pas ikan-ikan aron ngerik ningok aik kulong ne berubeh, pas ikan tepalak ijau pegi pindah ke lelap belakang umah,...Inget lah.

Malem Jum'at

Bejuget di sudut  e kamar  ku, di antara tige gambar yang dek jelas arah e dek jelas bentuk e, trus belalu sampai badan ne leteh sampai mata ne ngantok ntuk ngadep ke arah yang makin gelep.

Ku cube terus jalen ngelanjut ape yang ku rase kurang, tambeh parah, lagu-lagu yang musik e dek ku taul makin mawek ati ne dek tau arah, malah sampai kepala pon ngikut beguyang, ukan ku dek seneng!!! tapi liet malem ni!!! malem jum'at, cube piker-piker!!!

Dak de agik urang-urang bace yasin pas abis sembahyang magrib, dek de agik urang liwat pakai kopiah pas neg nunggu magrib, dek de agi suara budak-budak ngaji yasin malem-malem ni.

Mimang dak aneh, tapi terase ilang e, terase hampa e, ari terus beganti, musim cempedak pon lah dateng, kapan terakhir kali maken cempedak? atau lah lupak rase e, mimang dak aneh, tapi ade yang ilang kan?

Cube bepiker sebentar...

Nah besok mungkin bakal ade gerhana matahari

Besok mulai belajar angka 0 kek 1

Besok marah pon dak de gune

Besok ku dapet ape yang ku neg.

Kemane Ka Kawan...???

Lame dak ketemu...Dari ilang e embun pagi sampai dateng e bintang yang ngias bulan, dari bising e gelumbang ngamtem batu karang, dari tanggal 10 april 1932 jam 11.00 malem sampai detik ne.

Kalok ketemu agik........
Tuanglah jernih e aik ke dalem cangker yang nunggu di depan mate untuk terus penoh kek sejuk e mimpi

Berik lah setites wangi-wangi e minyak wangi di impak-impak e jiwa yang dek neg ngerabek arti kek makna e sejuta kunang-kunag yang terbeng di dingin e malem

Atau malah
Buanglah gelep e malem yang ngelingker di leher dari sekian banyek e urang-urang yang dek pecaye kalok ku ne ade, ku ne nyata, ku ne bagian dari bumi yang kite pijek sekarang ni.

Sebab ari

Waktu yang muet ati ne terus nunggu pas dateng e sinar mate ka di depan tempet sembahyang yang galek dipakai kek pak pas waktu subuh e

Trus ngebayang-bayang jalen yang makin jadi bayang-bayang, kadang malah buet muka ne jadi tambeh mirah ati tambeh sedih badan ne pon jadi lesu 

Sampai kinik agik ngarep terang e ari-ari yang terus ade di depan langkah kaki ne, biak terus tiap jegkel e pacak diambik hikmah e, untuk anek cucuk kelak. 

Ku Tanyak Kek Kembang...!!!

Senin, 11 Januari 2010

Malem lah jadi siang, siang pon lah jadi malem, kemane ka kembang? Ka simpen rahasia ku di sudut ari ka buet jadi segenggem embun yang mulai muai dari mata ne. ka tau dek kembang, ku tau sebener e ka tau kalok ku dak tau ape warna kek cemane wangi e ka, sampai lupak ku kek segale bayeng-bayeng ka yang abstrak, warna ka yang penoh kek warna e, ngumong lah kembang, biak ku pacak ngikut alur cerita ka, biak mimpi ne ngulek agik, biak ku tau cerita muka ka, jangen ka diem kembang, ku agik duduk di sinik nunggu ka ngetik nunggu nuansa ka, ku tunggu bekawan kek lagu-lagu yang ngundang segale rindu, kek tige binatang yang terus ngajek begagit ku.

Ngulek agik ku nanyak, pas lagu-lagu mesra menyeriangi muka e di depan ngelawan angen, kapan dateng? Kapan pulang? Peluk segenggem arep ku semai segale imaji yang terus lari sampai sepi ne ilang dari ari-ari yang lah kek mati, serentak kek mekar e lalang di musem ujan ni, kapan dating? Kapan pulang? belay mesra kelinci-kelinci yang alus bulu e, yang tebel bulu-bulu e nutop muka e yang cakep, atau malah cumbu mesra arti dari segale keneg e jalen yang bawak kite ngulek

Ume yang dek subur tesiram ujan, mulai tumbuh mekar kembang-kembang kemunting ngundang segale madu ngiler gara-gara wangi e kek bagus warna kembang e. Burung kutilang pon lah nyanyi dari pagi tadik, sambut ari ne, besukor kek anugerah Tuhan, ngucap segale doa untuk Tuhan. Ku, ku agik disini nunggu ka, nunggu segale yang ku neg, yang ka taut u ape.

Ari Lah Dalu

Minggu, 10 Januari 2010

Dak agik ku kejer bayeng-banyeng e mentari yang semakin jauh ninggal bumi ne, dak agik ku lari nyarik adik ku yang senyum e ngalah-ngalah budak bini kemaren, dak agik ku berik ati ku kek urang-urang yang bekelumpuk neg nyarik kulat kukur, dak agik kawan dak agik. Cukop lah sekali ku ilang piker ku ilang sadar ku dari muke-muke urang dek bemuke, biak lah ku jauh dari ape yang ikak bilang sinar ape yang ikak bilang ari. Ku tau ari kate ikak ukan ari kate ku, sinar kate ikak ukan sinar bagi ku, yang jelas ari kek ku ne deket sedeket mate ningok idung seakrab cempedak kek nangkak.

Ku ge ningok mate yang maen mate ke arah satpam-satpam pasar, ukan malaikat dunia ne yang ngerase dirase, ukan pagi-pagi yang disambut urang di TPI, ukan ngerik untuk bagun urang tiduk yang tiduk e tiduk mati, segale tu logika, yang kite padu kek segale tuntunan kite, segale tu jalen, yang mintak segale piker kite, pas disimpang, pas dijembatan buruk.

Atau malah mimpi urang-urang yang idup e penoh kek segale duse, takot tiduk dek bangun agik, takot kek kiamat e dunia ne. entah lah carik sendirik-sendirik ape yang ikak tanyak kek ati ikak, jawab sendirik-sendirik pe yang neg ikak jawab kek ati ikak, yang pasti kite dikubur kelak sendirik, bawek duse sendirik, ngerase sendirik.

Ngarep

Ade arie kelak burung-burung be bunyi kayak Ababil yang siap di ates kepala, ape yang ku buet ? Bejuget diates awan yang makin ari makin item, belari kayak semut yang neg nyebrang laot, ngerabek selak e ati ne yang makin tenggelem, pas tu tejadi jatoh lah segumpel es dari langit, urang-urang pon ngerik kayak sangkakala disebu kek malaikat, ape yang tejadi? Dimane mimpi? Ape arti ni? Ku cuman budak yang neg idup kayak urang normal, neg jadi arti tiap jengkel kaki ku ngelangkah.

Cemtu pon kembang kedebik, bagus pas mekar-mekar e cikar pas pecah bueh e, tapi tiap ari nya mekar, tiap ari pecah bueh e, sampai semot-semot pon dek tau ninggal bateng e, perbak tiap ari mutek bueh e, malah kadang budak-budak pulang dari kulong galek maken e. Kemane agik ku neg ngerik? Suara lah parau ari lah malem, sing lah dateng pagi lah ilang, Ape? Embun? Jangen tanyak agik arah e.

Akek antak pon marah. Utan lah nangis nyarik anek-anek e yang pindah dek de agik di kampong, ikan tepalak lah pindah idup e di kaca-kaca urang kaya, kelik lah ilang di lelap belakang umah lari ke kolam-kolam semen yang penoh kek zat-zat kimia dari segale zat, sape peduli? Dimane harge e tiap-tiap dari kebennya? Yang ade ge banyek utek-utek urang ketawak ningok nasib e, banyek urang nyukur idup e, banyek urang nutop mate ngingok tingkah laku e, tu ukan masalah! Kebajik ya lah! Agik lah!

Pagi Dek Be Embun

Ape yang kite carik? Tekesep-kesep di utan nebeng kayu pelawan, sampai dak neg agik kulat pelawan tumbuh, begagit kek segale sangker kerengge, sampai langok tepatong ningok muke e, Lalu laleng didepan umah, sampai dek keliet agik jauh paser kulong depan umah ari pon lah berubeh, siang jadi malem malem jadi siang pagi jadi item embun jadi areng....

Jangen tanyak kek ko agik, anggep lah ku lah dek de agik, pegi kayak awan nyair jadi ujan, dek jadi embun yang ditunggu-tunggu segale urang-urang. Ukan cahaya yang mulia. Mulia ari mulia waktu.

Ku lah dek tau agik jalen ne, simpang e lah kebanyek igek, kayu yang ku pigang pon lah ilang, dimane are pelawan di daerah ni? lah banyek ular sabek  mati dikulet urang di jadi tas, lah benyek buaye-buaye lari kedaret, kayu pelawan e dek be bekas dek be warna.

Ka

Senin, 04 Januari 2010

Arti ka…, lah kayak daging yang muat tulang jadi makin kuat, buat ari makin besinar dari malem sampai ke pagi e, sampai ku sadar ka lah kayak bagian dari mimpi-mimpi jalen ku, yang terus harus ku jage kek ku tunggu. Ku jage dari segale kutu-kutu yang terus maken buku-buku, dari virus yang ngantem file-file dikomputer P3 ku, walaupon ku harus nunggu hari yang ku tunggu dateng untuk bawak ka ke ko seutuh e, ku tunggu waktu Allah merestui kite untuk trus besatu. Walaupon sekarang ka ukan punya ku, trus ku bearep ade e jalen ka untuk ku.

Karena ku yakin ade jalen yang libar, selibar bandwith e FO, secepet lari e topi mirah, sebagus e GUI.

Sebab kesederhanaan ka sentuh ati ne, sesederhana Terminal, sekuat bin, seindah e rpm, sepinter e vi.

Untuk kawan ku

Kelak-kelak e, malem kite rase kayak awan yang terus ngambang, trus bateng-bateng cuman jadi hiasan 3D yang nyamen diliet, cemtu ge urang-urang deket-deket kite, berubeh warna mata kebennya jadi item penoh kek bebulek e, Ape yang ku berik kek ka dunia? Dak de rupe ka yang pacak ku gambar tentang ka, dak de maya yang mengilhami nirwana. Ku cuman pacak bilang "yang neg tejadi, tejadilah" untuk segale cerita.

Cemtu pon pas kembang-kembang laleng lah mulai kering, ku hanya ningok mekar e, dak pernah ngerase wangi harum dari puteh warna e, atau ningok ketawak e pas terbeng e nyebar bibit-bibit di angen yang panes e nusuk mate, malah kayak dak de tenage neg ngambik sikok bijik dari yang terbeng-terbeng to untuk ngisik tanah ku yang lom subur, ape arti ku mentari? Panes ke ngelemah ku dari segale jiwa kek ati ne, ngape dak kuat nafsu ne nanggong rase rindu yang terus terase diati ne?.

Ku tau ka pon tau sayang, ka tau ade segumpel emas yang ka tinggal untuk buet jadi perhiasan paling mahal yang ka buang di gelap e malem sampai jam yang dek ka inget agik, pas urang-urang kebun dek sadar agik arti e idup, sampai pulau-pulau kecit pulau seribu tenggelem ilang ditelen ganas e idup, ku tau ade sinar dari sudut mata e lukisan Leonardo da vinci yang buat mata e terus ningok e sampai dek pacak bekedip, sambil mulot terus ngerameng dari bagus e. trus untuk ape warna-warna di idup ne?

Tinggal segudang mimpi yang ku tulis di kitab-kitab tua, buet resah ati untuk dibace terus e dak de arti e untuk budak-budak bujang.

Lah ku tebar duri-duri di segale jalen ku

Minggu, 03 Januari 2010

Dari mulai jiat e muka sampai dek ngeretak apalah ari
Ape yang kudapet?
Duri-duri e ngentem kaki ne sampai lama dek pacak bejalen
Nikem ati ne sampai nangis pon dak de agik gune e

Ku ganti nebar segale cinta kek kelembutan di tiap angen yang ade deket ku
Ku hias kek segale seni yang ku tau
Warna e pon paling bagus diliet segale mate urang
Dek pandang bulu
Ape yang ku dapet?
Segale tu kalah kek nafas e urang-urang munafik
Urang-urang yang utek e dek pernah di cuci
Malah ku tebuang jauh dari jalen ku

Ku cube pasrah
Diem dek begerek kayak urang-urang yang gemok badan ne
Berarep ku ge pacak gemok kayak tu
Ape yang ku dapet?
Ari beganti ari utek makin terase mati
Badan mulai terase ade penyakit didalem e
Sampai mati suri due kali

Trus
Ku neg cemane agik?
Lari salah diem pon salah
Jahat mati baek mati
Ape segale ni mimang jalen
Ape ku ne dak jadi kayak ape yang ku neg
Lah nua lah, umor pon lah tua kek di buet maen-maen
Ku ge neg lah ngerasa idup ne bener-bener idup
Kayak yang lah kuliet

Ape dak pantes?
Trus kalok dek pantes ngape ku disini
Ngape ku agik ade
Ku lah dek tau agik lah bingung e
Neg marah ge marah kek sape, ngeruce kek sape
Badan terase kayak paser di pinggir laot
Terus disiren ombak ketengah kek dikit-dikit tenggelem
Kayak pulau yang digalik paser e nunggu waktu e bai ilang tenggelem di tengah laot

Kemane embun-embun ne ilang

Sabtu, 02 Januari 2010

Dak bebekas dingin e di daun-daun lalang ne
Lah jauh ku bejalen nunggu nyarik hawa e
Dari Lubok sampai Payak Benue
Dari Mapur sampai kemuje
Padahal lah kutingok senyum e kemaren
Ngambai tangan e kalok nya lah neg dateng

Ku ngelamun sebentar
Pikir apa agik yang ku gawe udeh ne
Jauh sampai teinget muka mak pas nangis
Dek sadar ku ge nangis
Kerasa jatuh he aik mata ne dipipi ku

Kulintang pulang kulintang dateng
Kulintang terbeng jauh di genggem
Ilang lenye tinggal sekelumpok perbak
Tengah beradu merayu burong perit laen e
Perincek pon dek agik bebunyi di sebelah kiri ku
Dak neg agik angen maen kek bateng kelapa

Dek tau ngapa lah
Ari pon lah mulai siang
Lah mulai nunu belukar bekas ume mang bujang ne\
Kaki pon mulai merajuk ngajek lari
Jauh dari embun yang lah ilang
Dari dingin e yang cuman pacak ku keneng

Entah lah
Ade ari ade masa
Kite cuman manusia yang bute kek jalen idup ne
Cuman urang yang bejalen lalu di idup ne
Moga bai do'a-do'a kite tekabul
Diterimak kek Tuhan segale sujud kite.

Sejauh mane ati ne pacak nahan

Sekuat ape badan ne pacak migang
Pas ngerasa lah dapet, tetep bai kayak e mudel ukan nasib dirik
Ukan untuk dirik
Trus cemane?
Masak dari duluk cuman jadi tukang mimpi
Cuman ningok kek nahan ati

Sejauh mane ati ne pacak betahan
Sekuat ape badan ne pacak migang
Peduli kadang malah kayak racun yang kek bunuh badan
Ngeloh malah tambah jadi ngerusak ati yang lah rusek
Nangis? Tambeh kayak urang budu yang dek de tujuan ne bejalen

Trus
Sekuat ape badan ne pacak migang
Sejauh mane ati ne pacak betahan
Disamping mate ne ningok kanan kiri yang mulai ngerase dak sesuai
Jauh dari pandang e urang yang pacak mandang

Mimang mawar to harum sesuai kek penunggu e
Angen digunung to sejuk sesuai kek tinggi e
Tapi tinggi kek penunggu kan dak terus-terus sesuai untuk di adep
Malah kadang lah diadep pon dak sesuai harum kek sejuk e

Entah lah
Ku pikir-pikir duluk
Banyek urang dak beruntung dari pada urang yang beruntung
Banyek urang nangis dari urang yang ketawak

Kadang e idup

Kadang e idup nyuruh kita sabar lebih dari kesabaran kite
Sampai pecah sabar to di dalem badan
Belambur keluar dari badan
Jauh akhir e terbeng ke langit

Kadang e idup buat kite ketawak
Nyuruh kite sembunyik dari ati kite
Dari masalah-masalah yang dak pacak dipecah
Sampai nangis pon terase dak de gune e
Sampai mati pon males neg dateng
Cuman nunggu ari beganti jam, jam pon beganti waktu

Kadang idup malah buat idup
Nanem bateng-bateng yang kuat untuk idup
Kuat untuk bediri dari cerita e idup yang dak de betuan
Dak de mimpi-mimpi pas tiduk di dalu e malem

Tapi kenyataan ne
Ade nyek yang idup e trus di tengah-tengah laot yang lepas
Pecaye kalok idup ne mimang harus tetep ikot terus
Sampai bates dari idup abis dek pacak agik diliet kek mate

Ade mbah mi yang terus senyum ngeliet idup ne bejalen
Trus belajar dari tiap langkah-langkah e idup
Sampai kembang-kembang jagong pon kering
Malah sampai pulang e agik burung yang lepas dari genggem e

Agik tinggal timah hau-hau dipaser yang entah kapan jadi berisik
Sampai pacak naek SN e
Pacak untuk dicarik agik kek ngisik ari-ari yang duluk ramai
Dari umong e urang-urang yang pernah ade

Idup kadang mimang lebih susah dari mati

Trus nyiksa ati yang semakin tua
Semakin dek de arti e di depan urang-urang
Dak di anggep dirik ne
Ade ge dek pengaruh, dak de ge dek pengaruh
Tu ge ade sebagian ne nganggep badan ne amak
Kutu-kutu yang dek neg dideket kek nya
Takut kenek kerunet kulit kepala e
Muat nya tembeh nua garuk-garuk kepala
Atau malah kayak asuk
Najis untuk dipegang, haram dimakan

Mati pon kadang lebih bagus dari idup
Ditunggu lom dateng di arep-arep lom dateng
Nangis, ngerik, ketawak, dak de agik arti e
Depresi utek ne dari segale jalan yang lah diliwat
Makin ari makin dek tau arah e
Malah pas dipiker-piker tambeh besak bai item didepan jalan
Makin gelep dak begambar ape-ape
Buat ati ne makin takot
Makin gemeter neg ngelangkah kaki ne
Makin kecit jengkel jalen ne

Sape neg peduli kek idup ne
Urang yang bace ne pon paling cuman ketawak
Malah ngebudu-budu badan ne
Makin kayak e budak kecit piker e
Padahal nya dek tau sesusah apa ati ko betahan kek idup
Betahan bilang kek ati ko ade harapan didepan
Ade jawaban didepan
Walau utek ne kadang e dek yakin
Tapi terus diyakin-yakin
Sape kek tau cemane rase ati ne
Bukan masalah cinta
Bukan masalah miskin
Bukan masalah budu
Tapi
Lebih dari tu
Lebih dari yang pacak ka itung kek tangen ka

Ku sekarang ne mimang sendirik
Bediri sendirik jatoh sendirik
Pegi sendirik keseset sendirik
Ketawak sendirik nagis sendirik
Entah mati e sendirik ape dak
Ku dak tau

Ku kurang ngerti kek rasa e betunang

Kate urang-urang
Rase e kayak di belai lembut e wangi kembang mawar
Kalah seneng e pas hari raya dateng
Macem ketemu kek kawan lame, kawan-kawan sekulah duluk
Malah kayak nyamen e angen di pantai Tuing pas waktu surut dateng

Entahlah

Tunang to dak same kek bini
Yang pacak bener-bener dipecaye
Nerimak segale ke kurang e kite

Ku piker hal-hal jiat e
Yang ku rase kayak “gas emisi CH4” yang terus ngancem
Walaupon “senyawa saponin” pacak neken ade e zat to
Atau kadang-kadang kayak isik dari "Timaeus kek Critias"
Yang terus bai jadi tanyak e urang-urang di dunia

Entahlah
Mungkin ku bai lom tau masuk daerah tu
Lom jauh atau mudah-mudahan dak kek jauh masok ke situ

Bagi ku
Cukop ku simpen di ati
Dak usah banyek ulah
Cukop sekedar ngisik jalen yang biru ne
Yang cuman hanya sekali ketak ku liwat sini

Di tengah e lelap belukar, di dalem e kulong ijo

Ku tinggal segale e
Dari ngeliet besak e ikak tumbuh kek bekembang
Kek segale siang malem e yang ade disanen
Ukan mimpi ukan bebulek
Ku pegi makin jauh ninggal segale yang ku liet pas kecit
Keseset di tengah-tengah urang-urang ketawak
Te empes di dalem e laut bedukang
Di liet item segale raut muka ne
Dak kek kayak urang agik
Jauh dari sepradik dari adik kek akak ku
Sampai anek-anek ku ge nanyak kemane sebener e piker ku pas duluk
Entah salah sape ku ge dak tau
Dak pasti kayak ngitung jengkel arah langkah yang ku itung

Ku teros lari dari kearah yang entah ku lom tau pasti e
kek segale bahasa e, segale tingkah laku e
Semakin be rubeh-rubeh
Ngajak ngambar ari ne ngajak ngebet tali ne ke tiang gantong
Trus tejadi sampai ku dak tau pasti e
Entah item atau puteh bersih kayak ubi dikelos

Dak kek ku puja kayak urang seneng kek budak bini pas seneng-seneng e
Dak kek ku sayeng kayak urang sayeng kek anek e
Dak ke ku ngulek kayak gatotokoco kate urang jawe
Dak kek ku yang dak ku neg

Paling kelak e kembang-kembang kemunting beganti jadi kembang-kembang mawar
Yang makin nyamen diliet nyamen ditingok
Atau malah tambah parah
Kembang kemunting berubeh jadi paser isep
Yang siap maken segale yang pacak diisep
Bekawan kek bauk solar kek oli bekas TI
Yang dak kek abis te burai nguas cuman hanya kenak mentari
Cuman kenak cuci dari tangen-tangen yang kutor
Tangen yang takot miskin takot idup
Takot kek segale yang nya takot