Pak Ngerayu Mak

Rabu, 16 Desember 2009

Jangen merajuk agik bini ku
Ari lah pagi dek baek ditingok urang
Malu ditingok kek anek-anek kite
Ayo kite bukak pagi ne kek senyum kite

Lietlah
Embun-embun di bueh-bueh cempedak kite
Akrab sampai keliet warna ijau cempedak e
Sampai baseh bulu-bulu daun cempedak e
Masak kite dak pacak nyambut pagi kayak kebennya

Lah ok, lah sayang
Ku ngakuk ku yang salah
Ku tau pendapet ka kemaren lebih masuk akal
Lebih pacak ngangket derajat keluarga kite
Lah ok
Jangen merajuk agik
Kasian kek muka ka
Lama-lama macem tu kelak ilang cakep e
Cube ka senyum
Keliet cantik e kayak budak agik gadis
Kayak ABG kate urang jaman ni

Lietlah ayem-ayem kite lah ngamuk-ngamuk mintak maken
Yang item to pas tengah betelok keliet e
Kebennya nunggu ka sayang untuk berik maken e
Dak de ka yang berik maken e kebennya dek neg maken
Dak de agik urang diumah ne yang pacak ngurus kebennya kayak ka sayang

Liet lah, burung-burung perincek lah mulai nyarik maken
Tu cube kite liet di bateng jembuk belakang umah to
Banyek dari tadik besiul-besiul ngisep bunge jembuk kite
Kayak e kebennya to sekeluarga
Kompak nyarik maken dari utan sampai dibelakang umah ne
Sambil kadang-kadang kebennya begagit kek anek-anek e
Akrab ge kebennya to
Iri ku ningok e

Sayang, dak merajuk agik kan
Nah cemtu ge senyum
Kan keliet cakep e
Seneng ati ku ningok e
Kayak ningok kembang kelapa yang pas mekar-mekar e
Kuning, bersih wangi keliet bagus e
Nah dak salah ku sayang kek ka ne sayang
Ka lah urang yang paling pacak damping idup ku ne
Makasih ok untuk segale ne, makasih

Pegilah Ku Ikhlas Ngelepas E

Serindit ku lepas pas ku pegang
Terbeng jauh dek tau agik arah e
Entah kemane, paling-paling nyarik bini e
Yang lah lama nya tinggal pas dari nya ku tangkep duluk
Atau nya nyarik bunge rembiak yang banyek di lelap kampung sebelah
Dek neg agik maken tebu puteh yang ku berik tiap ari
Atau pas dak de malah cuman bungkal nasik puteh bai

Biaklah

Sambil nangis ku ningok e
Sambil ngeruce-ngeruce ku ningok e

Biaklah

Nya idup di dunia bebas
Dak nyusah ku berik maken e
Dak leteh-leteh ku bersih sangker e
Paling kelak-kelak anek ku pacak ketemu kek anek-anek nya
Ade ge kek jadi kisah pas jaman kelak kayak kisah akek antak

Ku agik inget warna e
Ijau ade mirah-mirah e dikit di arah kepalak e
Kayak daun sahang pas subur-subur e
Kaki e kecit biase tiduk e begantung kepalak e dibaweh
ku agik inget

Ku cuman pacak be do'a bai
Biak nya dak saro idup e
Idup di utan yang semakin ari semakin susah
Semakin lama semakin parah

Ku cuman pacak bedo'a bai
Biar nya ade rejeki nyarik ilmu agama
Pacak ngaji kek ngamal ilmu agama e
Biak dek susah di akhirat kelak dak jadi tanggung ku diakhirat kelak
Atau pacak dapet bini yang pinter kek agama
Pinter kek situasi dunia
Ku ikhlas nya lepas
Ku ikhlas
Demi masa depan e yang agik panjeng
Agik pacak ngelukis indah di muka-muka dunia
Ku ikhlas
Ku ikhlas

Ku kek kulong ne kayak budak Bini kek Emak e

Yang tiap tiduk di nyanyi lagu melayu nganter tiduk malem e
Senyum mendukung segale tingkah e
Dari segale belai mesra biru aik e
Segale warna bateng-bateng ketakung pinggir kulong ne

Macem ikan kiung kek anek-enek e
Trus jage kek terus jage
Tuntun arah langkah jalen takot keseset
Usir ikan-ikan besak laen yang nek deket-deket

Atau

Kayak kariamon yang ade di kulong ne
Trus tumbuh kek terus bekembang
Buet biru warna dalem aik ne
Buet tempet ikan aron sembunyik dibaweh e
Malah kadang udang-udang kecit pon ngikot sembunyik

Kek kebennya lah ku pacak ngadu panes e mentari ne
Riak angen nya lah yang pacak buat ati ne senyum
Kerumun ikan kemuring lah yang makin nyeneng hari-hari ne
Dari segale tajur yang lah ku paseng
Segale tepalak yang maken pancing ne

Ku malah ilang senyum pas ninggal segale ni
Serase ilang arah ngelangkah kaki ne
Meski ku carik-carik di daerah laen
Dak same dak kek pacak same kek kulong ne
Meskipon dipaksa-paksa dak kek same
Malah tambah sedih ati pas nginget e

Ape agik pas lah kek magrib
Ku mulai gelisah kek arep ku ningok belido
Ningok ikan bulan ngelupor-ngelupor
Yang kadang muat gelisah ati ne
Takut dak pacak agik ningok e di masa-masa kelak
Muat sedih ati ne
Takot pagi dek dateng untuk ngangkat rawai-rawai ku
Pas ujan-ujan malem ne ku cuman banyang bai
Ape yang ku arep ape yang ku neg
Ku cuman nunggu pagi entah dateng entah dak
Walaupon embun-embun e lah mulai terase
Walaupon dingin e lah mulai ku rase
Tapi tetep ku terus ngarep

Subuh lah dateng, embun-embun pon lah mulai turon

Selasa, 15 Desember 2009

Mulai terasa dingin e alam ne
Angen dak agik neg bekawan, mulai nikem-nikem dade
Mata ku yang dari tadik mbukak lah mulai ngantok
Piker ku tetep miker ari-ari ku yang dak terase lah jauh ku lari
Lari dari tatap mata e urang-urang yang lom ku kenal
Dari tempet yang kayak e ukan untuk ku

Sampai kapan
Dimane terakhir e

Ku mulai inget ku inget-inget
Jauh dari umong e urang-urang tua
Kalok idup ne dak kek abis kalok dikejer
Dak kek cukup umor ne untuk ngejer e
Mending berenti ditempet dimane kite nganggep jalan idup to ade
Atau teros nyarik tempet-tempet dimane kembang-kembang senyum kek kite

Dimane
Ape name e

Ku ge dak tau arah jalan e yang ku liwat ne
Kadang malah ku liet simpang-simpang jalan yang dak belampu mirah
Maksa kaki untuk cepet liwat sebelum ditumbur urang laen
Meski nama e balak dak pacak ditolak
Tapi usaha harus tetep ade kek harus ade
Dak de kate-kate nyerah liwat segale yang ade di idup ne
Walau ku tau idup cuman jalan untuk mati
Atau idup cuman numpang didunia yang dibuat Tuhan
Tetep bai ku teros tetep lari
Sampai kaki ku leteh

Ape ge
Pacak macem tu pulik

Ku ambik selimut nutup badan ku yang kurus
Biak dak pacak ditingok angen yang makin marah ngeliet ku
Biar pisok-pisok nya dek pacak nembus badan
Sampai panes e badan ku lah mulai terasa
Kek kaki ku lah mulai gemeter
Ku paksa mata kek badan ku tiduk
Tinggal segale piker-piker ku
Yang teros nanyak kek ati ku
Maksa teros untuk ko jawab semue tanyak e

Kayak e ade sangker murai di bateng kelapa pinggir umah kita pak

Ku liet enduk e berape ari ne muter-muter bateng kelapa kita
Kuliet ade due murai di situ tengah betunang
Keliet mesra e, biase e tinggkah murai item to dak macem to
Tengah seneng-seneng e mungkin
Liet lah pak!
Kemane-mane kebennya bedue terus, nyarik maken bedue, mandik bedue, duduk ge bedue
Entah yang mane laki-entah yang mane bini
Bagus kayak e kalok ditaruh di pinggir umah kita
Suara e kayak urang tengah besiul bawek timah banyek
Entah bateng yang mane
Warna e idup kayak lukisan e gambar cewek yang pacak ngeliet kiri kanan mata e

Dak salah kalok ku ambik ku bawak anak e untuk ku pelihara pak ok?
Biak umah kita ade suara e burung murai
Biak tambah hiasan umah kita yang lah mulai rubuh ne
Paling dak ade yang kite bangga di umah kite ne pak
Dak susah igek kalok diliet urang
Kalok ade tamu ade yang kek di umong pas nya bebunyi

Tapi cemane enduk e kalok ku ambik anak e
Pasti lah nya nangis pak ok?
Kayak ayem yang nyarik enduk e
Cuman kite bai yang dak tau cemane suare e nangis
Kata kawan ku kalok anek e diambik enduke teros ngikot nyarik anek e pak
Berarti kuat sayang e kek anek e
Kasian ok
Kite ge cuman manusia, kadang dak sepanjang tu kite miker pak
Padahal kite kek nya sama-sama idup di bumi ne
Biarlah nya numpang beranak di bateng kelapa kite pak ok
Kalok yang duluk ku cuman mintak maaf kek Tuhan pak
Ku cuman manusia yang lemah, deket dari lupak, kecit pikir e
Ku tau Tuhan ku Maha Tau, Maha Mengerti ape-ape yang tejadi
Ku cuman pacak mintak maaf bai pak
Mudah-mudahan pacak burung murai yang kemaren to berik maaf ko

Apalah pacak e ko

Hanya budak kampong yang cuman pacak ngelimbang tu ge ngikot urang
Lom pacak nyarik tailing sendirik
Apa agik neg idup bawek anek urang?
Ntah cemana ku berik maken e
Dek takot?
Cemana dek, dari badan yang kecit ne
Dari duit ko sekarang lom ade yang ku tabong
Atau malah dari sikap ko yang dimata urang dak bagus

Jangen jauh lah ko bepiker
Agik maken ge agik besukur

Tapi ku ge kadang miker
Anek urang mane yang neg ku bawak
Ngeliet muka ko urang lah males
Kayak dak de harapan untuk idup di ari kelak
Jangen neg mimpi bawak Dewi, ape agik Eva
Dak nunggu ko kebennya cepet lari duluk
Biar jauh dari keliet e mate ko
Santi malah lah duluk-duluk lari jauh dari muka ko
Dak sempet ngumong aben
Malah kayak e ko jadi urang yang jagok menghayal bai
Trus kapan ku pacak betunang?
Dari banyek e kembang-kembang kerak duduk yang mekar tiap ari di paser
Makin banyeklah budak-budak kecit mutek buah e yang lah masek
Malah kadang agik mentak pon lah dimaken kek kebennya
Pernah ko tayak, “ape nyamen?”
Malah jawab e “ngarep asek e dek sebile lah”
Trus kadang e kan dak patot kalok diliet-liet
Tapi kebennya happy-happy bai kok

Tu duluk
Ape agik sekarang ne
Jaman lah jauh berubah, jauh maju kedepan
Care bepiker ko ge lah jauh berubah
Ape agik kebennya
Banyek yang pacak dipileh, banyek yang pacak diliet
Umor ko ge lah mulai tua
Muka ko lah keliet keripot-keripot e
Pinggir mata lah mulai item bentuk e lah mulai cekung
Heh
Malah tambah jauh urang neg ningok ko ne
Malah jauh matahari neg nyinar e bulan yang gelep
Apa agik embun, males neg nyirem badan yang beselimot
Tinggal gelep, sumpek, kek kaku yang dateng
Entah neg diulah jadi apa
Ku pasrah kek Yang Maha Kuasa bai lah
Ku pasrah idup ku untuk akhirat e

Pegi e kayu meranti kek ikan kelik panjeng

Kemane kayu meranti belakang umah ne
Kemaren perasaan agik disini
Sempet ku siram kek kapur biar subur bateng e
Ku pelok-pelok ngukur besak bateng e

Ape lah abis kapor yang ku berik kemaren e ok
Ape lelap ne bencik kek nya
Tapi lelap seluas ni masak nya dak neg disini
Lelap sesubur ni masak nya nyarik lelap laen

Ape bateng rotan ni yang buet nya pegi
Nya takot kek duri-duri tajem e
Atao ikan tepalak ni
Yang galek sembunyik dibaweh aker e
Galek gigit kulet yang lah mulai tua to
Tapi kulet e kan tebel untuk ukuran gigi tepalak
Trus masak tepalak neg gigit kulet kayu meranti to

Nah,.....
Ikan kelik panjeng dilelap ne ge lah dak de agik
Kemana kebennya ne ok

Padahal bueh bateng-bateng ne sampai busuk kadang dilelap ne
Dek sapa lah neg maken e
Biase e kelik panjeng kek kayu meranti tu lah yang maken e
Kebennya lah yang pacak ngulah e
Tapi kebennya lah dek keliet agik bulu mate e
Entah pegi kemane
Ape merantau ke lelap Bik Isah ok
Tapi lelap sanen kan tinggal sedikit
Masak mungkin kebennya kesanen
Atau kebennya di tebeng kek di tangkep urang laen
Kok ku dak tau
Dak de kabar-kabar e

Entah lah
Arep ku kalok kebennya pegi bukan gara-gara lelap ne
Bukan pindah ke lelap laen
Kalok ge merantau ku tunggu kebennya pulang
Bawak ilmu kek pengalaman yang baru
Yang pacak jadi bangga lelap ne

Sejauh-jauh e mata ne ngeliet,....dak de ape lah

Selebar-lebar e tangen ne ku rentang,...dak de ape lah
Sekuat-kuat e jari ne ku gengem,.....dak de ape lah
Sedalem-dalem e badan ne nyarik,......dak de ape lah
Seseneng-seneng e ati,...dak de ape lah

Entah dimane ka kawan
Lama dak ketemu muka ka
Kayak ditelen bumi dak keliet agik
kayak Sang pencinta ilang arah
Nyarik ape yang dak ditau nya
Kayak pisok di limpar di tengah utan
Dicarik semut kerengge dari atas bateng asem kandis
Ku terus ngarep ketemu di ari yang ku tunggu

Entah kemane ka tunang
Ku carik-carik bekas bauk ka
Ku carik-carik sisa senyum manis ka
Jauh pegi tingal segale yang ku keneng
Sampai ku dak inget ape-ape agik disini
Untung sempet ku lukis di sudut ati
Di sudut yang paling sudut pas ku carik-carik
Ilang nyaris dak bebekas

Entah kemane ka harapan
Kemaren ka peluk ko kayak e kite sahabat paling deket
Kayak sepradik yang terus jadi sepradik
Ilang entah kemane
Sampai mata ne lah males untuk ngenangis e
Dari sawit agik disemai sampai lah kek mati abis bueh e

Kemane ikak pegi
ku disini nunggu ikak sambil duduk dibaweh bateng kerak duduk
Lama lah kutunggu
Sampai ati ne mulai leteh
kaki mulai dak pacak begerek agik
Mata ge lah mulai rabun

Kemane ikak ngilang
Ku rindu kek ikak to
Ku rindu
Jangen tinggal ku kayak ni
Jauh dari arti, jauh dari mimpi
Kemane ikak pegi,....ku rindu
Kemane ikak pegi,....ku tunggu
Kemane ikak pegi,....ku lah kek mati

Pas pagi lah mulai dateng

Pas mentari mulai sebar panes e ke seluruh dunia ne
Kembang-kembang depan umah mulai ketingok bagus warna e
Wangi bauk e pon lah mulai terasa
Badan mulai ngerase letih, ngantuk, lemes
Tros ku cube untuk jalan kaki ngeliling daerah yang jarang ku liet disini
Sampai kaki terasa dek neg agik ngelangkah
Ku bawak badan pulang
Ngeringkes nyiap-nyiap untuk tiduk
Sambil ngerameng mulut ku ngumong
“selamet tinggal dunia, ku ngulek pas urang-urang ninggal ka”

Jauh dari mimpi ku yang agik takot kek mati
Untuk terus pacak begawe kayak urang yang normal idup e
Yang kata ati e dak takot kek segale ape-ape yang tejadi
Ku pon senyum
Ngeliet gambar muka ko yang lah semakin tua
Semakin dek berupa untuk ukuran ganteng
Siur-siur ku denger suare lagu
Buat badan begerek tambah gelisah

Ngulek agik jauh dari mimpi ku yang agik takot mati
Masuk dunia yang lom pernah ku liet
Serasa segale e ade
Dak de harge e duit, dak de harge e idup, dak de harge e mati
Kayak e seneng dak banyek mikir antara dunia kek akhirat

Tros
Ade nduk sukok liwat pinggir kaki ku
Terase ngelitik kaki ku
Ku bangun
Ku sadar

Mentari lah bener-bener terang
Siang lah dateng
Mata ku lah mulai berat
Ku ngerameng sekali agik
“selamet tinggal dunia, ku ngulek pas urang-urang ninggal ka”
“selamet tinggal dunia, ku ngulek pas urang-urang ninggal ka”
“selamet tinggal dunia, ku ngulek pas urang-urang ninggal ka”
“selamet tinggal dunia, ku ngulek pas urang-urang ninggal ka”
“selamet tinggal dunia, ku ngulek pas urang-urang ninggal ka”

Tunang ku

Minggu, 13 Desember 2009

Sampai kinik ku lom sempet bilang ku seneng kek ka
Walau ku tau, ka seneng kek ku
Dari tiap senyum sambil terus nyebut name ku pas temu
Dari terimak e ka kek ku ape ade e
Sampai cara ka ngadep ku waktu tiap-tiap betatap muka
Yang lama sekitar setaun setengah kite besame

Kite pacak liet tunang ku
Banyek cerita “cinta tak harus memiliki” tapi teros saling mendukung sampai mati
Mungkin tu lah separo e kisah kite
Kisah yang dak akan diitung kek cucuk-cucuk kite
Yang terus kite simpen di ati kite sendirik-sendirik

Samapai hari ni kite lah beganti-ganti masa lom temu-temu
Tapi yakin bai
Ku terus dukung ape yang ka gawe
Ape yang ka ingen
Ku iring do'a agar dapet tercapai ingen ka

Kayak kulat pelawan yang tumbuh cuman sebentar
Dak kek jauh dari bateng pelawan
Walau beda jauh hubungan e antara kayu pelawan kek kulat to
Tapi tiap musem ujan kek banyek peter pasti nya ada dideket kayu pelawan tumbuh e

Atau kayak
Bujang antan yang dari kecit pisah idup kek mak e
Tetep mak e ngerasa seneng, yakin anak e salamat idup e disungai payak benue

Kite ge macem tu lah harus e mungkin tunang ku
Dak pacak besatu tapi tetep deket rasa e diati
Dak pernah temu tapi ade kek terus idup diati
Sampai kite mati kalok mimang dakde jodoh untuk kite

Jangen tebeng kayu seruk tu

Biak lah nya besak, biaklah tinggi
Biaklah
Sampai mentari ketutup kayu tu
Kayak urang yang idup dak ingen mati
Meski lah lama iduk dari jaman e akek antak
Yang kadang malah lupak kek kabar e pahlawan 12
Jauh tebuang di piker e urang-urang yang lupak sejarah
Lupak dimane kaki e bepijek dimane matan e ngeliet

Lietlah
Ade kerengge yang muet sangker dibateng seruk to biak dak pindah
Muet istana besak kayak istana e raje Sriwijaya
Penoh kek kerukunan idup didalem e
Sampai murai-murai mulai ngerusuh sangker e
Rusak tros buet agik ngulang dari awal
Kayak dak pernah nyerah bai

Ade ge untuk kelak
Kelak Pacak ningok puteh kembang e pas bebunge
Atau mirah daun mudek e pas musem ujan
Sampai kayak bunge mawar yang mirah merekah

Pacak untuk ku naek ningok kapal liwat
Ngintai burung murai
Ngambik anek kerengge e untuk umpan mancing

Atau malah
Kite liet kayu seruk to
Kuat untuk Kasau umah
Idup di tanah-tanah yang dak subur
Tapi
Gatel kulit e kalok kenak badan
Berat batang e untuk dipikul
Keras kayu e men dipaku

Sampai dak de arti e sama sekali untuk kite
Pas dunia ne lah jauh dari badan
Atau masa yang buet kite dak pacak ningok e

Pas lah neg pulang

Tinggal prepas ku ditengah-tengah belukar
Di tengah ume pak yang lame
Ku ratap, Ku ratap

Ketapik Ketapang Pinggir Ume
Ku selik Ku datang ku tingok Ka Kene 3X

Lepas kek segale arep do'a-do'a
Sampai sure baru dateng gi nyelik
Ngarep puyoh pulang kesangkar e liwat
Atau pas puyoh madik

Mintak jangen kepon, jilat telunjuk tangen kanan gaser ke siku kiri
Mintak jangen kepon, jilat telunjuk tangen kiri gaser ke siku kanan
Neg gi kekulong ijau
Belakang komplek TTB


Cuman budak dek tau apa-apa
Mintak tulong kek segale yang ku dek liet
Entah bujang antan, atau nek unyil
Segale e

Akek, nek penunggu ku numpang liwat
Cucuk ikak cuman numpang nyacarik idup

Entah jauhlah segale yang jiat
Jauhlah balak jauh lah
Tajur-tajur ko jadi bukti
Jadi saksi ku cuman nyarik idup
Perepas ko agik nancep
Tande dakde yang liwat dari tadik atau kayu e keras
Kulong ijau pon agik tetep ijau
Tinggal ari terus berubeh beganti malem
Ngajak badan untuk mandik kek sembahyang

Yo lah ari, jangen ujan pagi ne

Biar pacak ganti cerita waktu indah e pagi
Indah e mentari sambut kembang-kembang kelapa
Yang tiap pagi begagit kek tupai
Dari kemaren lah ujan teros dak berenti-berenti
Bueh-bueh semangka pon lah mulai pecah
Depan umah lah mulai banjir

Jangen lah belanjut ujan
Kasian mata kek ati ne
Tambah sesusah miker segale yang ade
Tambah bingung pas waktu perot lah mulai laper
Mulai ngeruce-nguce nyuruh badan nyarik ape kek dimaken

Lietlah
Warna awan trus mendung
Dak de agik muka e mentari
Aik kulong lah mulai dalem
Dak de keliet agik tunggul bekas camoi tambang amang a'i

Cemane trus ku neg ngelanjut cerita ko ne
Bajuk yang due ari kemaren ge lom kering
Mak lah mulai ngeruce-ngeruce bajuk ku lah abis
Masak ku cuman ningok ujan dari dalam umah
Pas perot lah mulai ngeruce-ngeruce

Hati ko rasa e lah dek kuat agik
Ujan teros, di umah ne
Entah ku dak tau
Padahal tetanggak sebelah dak tau ujan macem ni
Tiap ari ku tingok mentari e besinar teros
Pagi-pagi kebennya lah mulai begawe
Lah ngopi, sarapan kang malah kayak dak de bunyi e

Mungkin ku bai yang salah liet ok
Atau mimang ujan ne pecube Tuhan
Biar kami sekeluarga kelak dak takot ujan
Biar kami sekeluarga biase berujan-ujan
Mudah-mudahan bailah.

Di kulong PLTD yang lah tua

Sabtu, 12 Desember 2009

Ape agik yang ditinggal
Paser putih ?
Kulong biru ?
Atau ikan aron yang besak-besak

Yang ade ge nambeh tempet maen kami
Tempet terjun bebas dari paser ke kulong
Pacak masang tajur kek banyek anek tepalak e
Apa agik kemuring ?
Jangen di tanyak

Cuman bateng karet yang ditanem pak anik-atik dak besak-besak
Kebencet idup e nyer-nyer
Kek sahang dak pacak tumbuh didaerah ni
Ubi ge untuk ngambik pucuk e saro

Entah ape yang tejadi
Urang-urang mulai keluar begawe timah
Termasuk pak ku
Katae kenak pesangon
Trus pak dak begawe agik
Ganti nanem sengon ngambik upah

Pas mulai mati mesin-mesin PLTD e
Dek pacak agik jemur kulor baseh ko
Ngering rambut ko
Biar mak kek mak dak tau kalok ku mandik kulong
Dak de agik mang kribo yang nunggu e
Asuk-asuk aling pon lah ikut pindah

Tiap malem di kampong ku mulai dak belampu
Urang-urang lah mulai sibuk meli disel
Pak kek mak lah mulai begaduh berat bayar solar e
Masjid pon lah mulai gelep
Cuman jam 6 sure sampai jam 10 malem ade lampu e

Entah lah
Waktu tu ku agik kecit
Yang ku tau ge
Jadilah kulong e kulong biru
Luas untuk maen perang-perang kek masang tajur
Tu deket samping bekas umah anik-atik
Yang penoh nanas kek jambuk bijik didaerah e

Lagu lagu melayu

Bisik-bisik di bilong ku, teros ku denger nya nyelimot badan ku
Dari panas e hawa paser kulong ijo
Sampai dalam e laot bedukang
Teros muter-muter rayu ati ku
Apa maksud e, Apa gune e
Ku mulai pening miker e

Ari pon mulai malem
Same-same kek mega mirah nya pon makin nyamen
Ombak-ombak yang tadik pagi begulong-gulong
Kinik tinggal kayak aik kulong kenak angen
Aik laot pon mulai surot
Jauh ku liet ke depan lah keliet paser pantai e

Tapi
Lagu melayu teros malah makin kuat
Dak sebates bisik-bisik agik
Malah kayak urang karaoke
Kadang-kadang sekali-sekali
Ku dengar suara urang besurak-surak seneng
Malah mulai ngajek kaki ku untuk gi ngeliet e

Ku tahan ati untuk tetep disini
Ditempet ku pacak ngeliet paser pantai bedukang
Samping pantai tuing kata urang-urang

Trus kayak e ade suara miak
Suara yang dek kek ku lupak di bilong ko
Ketawak e acit mimang kuat
Entah, mimang miak kinik lah gadis kok

Ku tahan ati untuk tetep disini
Malah ku piker-piker mending pulang
Badan ku lah mulai leteh
Ikan-ikan ni pon lah mulai lemah
Ku takot busuk kalok ku lambet pulang

Trus lama ku miker
Akhir e mimang bener
Ku mending pulang
Kasian mak kek pak lah nunggu di umah
Pasti mak takot kalok ku lambet pulang
Biarlah suara tadik trus ade
Ku mending pulang
Adik kek akak ku lah nunggu
Walaupon ya ben atau semacem e
Mending ko pulang
Ade ari isok untuk ku

Di rindang nge bueh kelapa

Jumat, 27 November 2009

Di syahdu e suara burong perincek
Siang to jam 10 pagi
Ari dimane urang – urang sekeliling ko lom ko kenal
Dimane kawan – kawan ku lom tau kek harta
Ku liet segumpal senyum manis e budak bini ke arah ku
Putih berisik badan e
Keliet kalok nya to urang yang teruros
Ku liet bateng cemara pas bebunge
Ku liet bateng kayu putih besak pas subur – subur e
Buat ati ku terasa di belai – belai cerita
Wee ni rupe e hari ni
Banyek warna e

Sampai ku pulang sekulah terus ku piker
Abis maken ku langsong nyiap2 umpan untuk mancing
Untuk ngeliet bagus e kulong ijo
Kulong deket pinggir komplek
Sambil sedikit marah ku kek ikan tempuring
Maken e rakus kek tukang ngabis umpan
Tetep ku inget
Senyum budak bini pagi tadik
Senyom yang ku rasa laen dari yang laen
Entah lah, mungkin ku bai yang ngerasa
Macem ikan tepatung yang ku anggep idup berkelumpok
Tapi kadang – kadang dak de macem tu di bawah aik ne
Atau macem ikan kiung yang ku tunggu
Yang lah ku liet kelupor e dari tadik
Kadang – kadang ukan ikan kiung
Tapi jelas, tu hari pertama ku ngerasa ati ku bebunge – bunge

Bunge?
Ku kurang tau masalah tu
Tambah umor ku ge waktu tu agik kecit
Agik seumor budak kelas 6 SD
Tros kadang ari – ari ku ge ngerameng kok
Dak jelas arah e
Dak jelas lari e
Samapai sure agik ku piker

Nyiang ikan, mandik, siap – siap nunggu malem
Badan ku terasa leteh
Penet gara – gara mancing tadik
Mata ku ge mulai ngantok
“mata kak ne lah linot”
kata urang tua tunu
Agik ku piker senyum e
Sampai ku doa biar mimpi melem ni
Senyum e budak bini di sekulah pagi tadik

Manis e senyum Dewi

Senyum e dilempar kesegale arah
Jadi segale e yang ade ngikot senyum
Penuh damai
Penuh tenang

Malem senyum
Warung mang li senyum
Tukoh mang sa'at senyum
Kembang depan umah saprul senyum
Apa agik ko!!!

Sambut malem lebaran idul fitri
Budak – budak mulai takbir
Mulai maen perang – perang kuset
Suara bedil pon beradu
Buat ari jadi idup

Teros teliet manis e
Pas jilbab e dipakai bejalen
Kayak kembang asik – asik dipaser
Bagus kalok ditingok
Malah kalok dari jauh kayak buah e

Ku inget – inget teros senyum dewi
Manis e
Kadang jadi lupak kek ari
Mimang bagus ciptaan Tuhan to
Heh, ..... mimang bagus

Butir-butir mirah e igik sahang yang diputek urang

Lebet e buah asik-asik di pasir pulau panjang
Banyek e bueh kerak duduk di paser jembatan
Besak e ikan aron yang kupancing di kulong depan
Yang terus ku keneng kek ku ambok - ambok terus

Walaupon harus ku liet dari tivi
Atau dari semue informasi web urang-urang
Terus ku kejer
Kayak ikan aron ngincer anek tepalak
Atau kayak ikan belido nyarik maken waktu magrib
Ape yang ku arep kek yang ku cita-cita

Dak de bates e dunia ne untuk bebuat
Dak de bates e dunia ne untuk belajar
Ku teros usaha
Ku teros jage

Meski ku pon sadar
Urang dak ngerti ape yang terjadi di ati urang laen
Ape yang di arep urang laen
Yang nuntut kite harus lebih teliti segale kelakuan
Segale tingkah laku kite
Untuk jalen-jalen ke depan

Entah,....

Teringet ku pas duluk bulan-bulan enem ngambik upah mutek sahang
Ketemu urang dari macem-macem kampong
Ngerasa jadi urang tiduk di pundok kebun
Sama-sama maken lempah daret dicampur kek sambel belacan

Entah,....

Setau ku bateng-bateng dek neg tumbuh di paser
Paling batang kerak duduk
Ya ge tumbuh e kebencet

Entah,.....

Ku bilang ape kek anek ku kelak
Kalok nya nanyak kemana lari e utan dibelakang umah
Kalok nya nanyak udara kok makin panes bai tiap ari

Entah, tanggung jawab siape tu
Entah, duse siape tu
Entah, jadi ape kelak e
Entah, cemane

Mang hen lah bunuh diri gara-gara TI e dak ngasil

Idup dak de urang yang nyangkak
Duluk jeruk mang hen subur – subur
Teros tiap taon biase e pasti nya panen semangka
Pasti ke umah tiap bulan puasa
Tapi idup dak de yang tau
Mang hen mati bunuh diri

Amang bujang lah gile gara-gara asil ngelimbang e dek sesuai kek harge solar e
Sahang mang bujang duluk ge lah kek ngasil
Tapi entah cemane dak tau kaabar e
Nya to urang yang yang kuat tenage e
Dak beriken kalok begawe

Iis lah dak de agik gara – gara kenak samber peter di kemp TI
Kawan ko dari kecit
Cuman pisah wak tu ku sekolah SMP
Nya ge termasuk urang yang pemiker kek idup
Miker untuk ari – ari depan ne
Kawan ku yang besak badan e
Tegep kek berotot

Teros kinik?

Tinggal pak udin yang komat-kamit mulut e ngucap do'a senen-kamis
Yang bedo'a anak – anak e jadi anak yang ngerti ade e neraka kek surga
Anak yang tau arti idup
Ngerti bahwa usaha untuk idup ni dak de bates e
Ngarep tros ngarep rejeki e berkah

Beradu kek suara mesin aik yang ngamuk

Antara berebut e urang ngambik tailing nunggu dibawah sakan
Nunggu urang abis nyuci timah
Sampai gelep ari
Magrib pon ilang
Dek bebekas

Besok e

Pagi waktu urang abis subuh
Mesen air pon lah bebunyi ulik
Nguras aik yang kemaren
Dibawah sakan e
Urang pakai sinter untuk nyinter tailing e
Nyarik paser
Ngelimbang
Buang segale timah – timah yang hau – hau
Sampai pagi urang – urang to nyuci paser pagi tadik

Isiang

Siang jam urang – urang maken siang
Lah mulai pulik urang ngelimbang
Nyarik tailing sepatau ade timah yang tebuang
Siang ne
Bekais rejeki

Teros belanjut sampai tanah e lah abis timah e
Sampai tanah e lah jadi kulong
Ninggal warna keroh aik e
Ninggal bauk miyak kek oli

Pas madgrib ku denger urang ngebang suara e parau

Ari pon lah mulai peteng
Urang – urang ramai di sakan
Mulai ninggal camoi
Urang – urang sibuk nyuci timah
Kaya e lupak kek jam
Teros teros lah kek tiap ari acem to
Lah kek tiap ari ko ningok e

Ku tingok kawan – kawan ku duluk e
Yang duluk bantu ku maen kelireng
Nya ge ngikot sibuk begawe di TI
Yang duluk galek ke umah ko
Nya sibuk gawe TI
Kayak e
Lah kek hampir urang yang ko kenal di kampong ni begawe TI

Entah kapan kek brubah
Semue urang lah beda

Duluk galek ku denger urang – urang bekisah
Ikan di bangkek ne banyek
Utan di bangkek ne subur
Kulong di bangkek ne bersih
Cewek dibanggkek ne putih

Ya, .... tu duluk
Kinik urang – urang lah maju
Lah pinter – pinter makai mesen
Dak kayak duluk agik

Tapi, ....
Ngulek agik ke suara urang ngebang tadik
Saking berubeh e urang kampong ko
Urang ngebang cuman ade pas magrib bai
Surau ramai pas hari raya bai
Atau pas nganggung

Entah lah
Kayak e ukan kempong ko agik
Lah jauh berubeh
Ku ge kadang nangis nginget e

Entah lah
Cemane ge ni tetep umah ko
Dak mungkin ku ngilak
Dak ussah munafik ko jadi urang
Dak bagus akhir e

Sampai mimpi ka di kerumun lalet

Kite cuman di titep idup
Dek pacak ngelawan takdir

Ade masa e kite kalah
Ade masa e kite menang
Siape yang dak neg maju
Usaha pon lah ade
Namon siape nyangkak

Ka ko harus pegi
Sampai mimpi ka dikerumon lalet
Leteh miker mending jalan bai
Kelak ge ade nasib
Pacak dak kite betahan

Meski sekarang pon agik mencarik
Carik jalan sampai dapet
dimane pon kite ade
Meski tetep usaha

Sampai mimpi ka dikerumon lalet
ka meski sadar
Tu lah kehancuran
Harus diubah

Kalok neg idup
Moga kite dapet mimpi kite
Jangan sampai di penuhi ulet

Bagi yang baru dateng

Selamet dateng di bangkek
Di pulau tempet laher ku
Pulau yang paling ku rindu
Yang paling ku seneng

Ade ikan kelesak (arwana)
Ade ikan aron (gabus atau snakehead)
Ade ikan tepalak (cupang atau betta)
Ade ikan kelik ular (lele)

Ade bateng palawan
Ade bateng nyato
Ade bateng mendaru
Ade bateng meranti
Ade bateng membalu

Ade belacan udang (terasi)
Ade keritek (getas)
Ade timah
Ade sahang (lada)

Ade sakan
Ade tailing
Ade TI

Pulau yang damai
Pulau yang nyamen
Pulau yang penoh harapan
Pulau impian urang – urang bangkek

Sahang kite, sahang kite lah masek gale

Mulai mirah warna bijik – bijik e
Lebet penoh junjung – junjung e
Ni waktu e kite tiduk di kebun
Mutek sahang ngundang urang
Alhamdulillah
Segale Puji Bagi Allah
Yang lah berik segale ni

Dari segale yang lah kite jalan
Dari segale warna yang kite liwat
Akhir e panen lah ade didepan mate
Musim ni kite pacak lah kepasar

Yo bujang dayang bangkek
Kite sambut bulan ne
Bulan mutik sahang
Bulan kite ngumpul penoh tawak kek ingel – ingel kite
Biarlah segale masalah yang kemaren – kemaren liwat
kinik kite sambut bulan ne
Liet sahang – sahang ne
Mirah lah mintak untuk diputek

Jangen takot dek maken
Agik ade lempah daret di pundok ko
Agik ade perepas ku paseng
Agik ade tajur ku di kulong

Yo kite sambut mirah bueh sahang ne
Yo kite sambut mirah bueh sahang ne

Kite ngelempah, kite ngelempah lempah daret

Lempah yang selalu kite nyanyi – nyanyi
Kite seneng – seneng dari duluk
Yang mimang lempah yang kearah sederhana
Tapi buet kite terus bersame

Dak de lempah kayak tu di tempet laen
Cuman kite yang punye
Jadi trus kite jage
Kite buat jangen sampai lupak

Lempah kebanggaan kite
Apa agik pas di kebun
Pas ramai – ramai urang mutek sahang
Pasti ade lempah daret

Lempah daret
Lempah daret
Lempah daret
Lempah kite urang bangkek

Ambik belacan, garem cabik kecit

Kite racik semue e
Kite yang racik
Kite yang maken
Semue e
Dari ape yang kite bise

Jauh dari teboali belacan ni
Jauh dari daerah laen garem ni
Jauh dari kebon cabik ni

Kite kumpul segale – gale e di sikok panci
Kite gabung kawan – kawan ne di dapuk
Untuk buat jadi lempah
Untuk buat kebennya nyamen

Tu baru buet lempah daret
Cemane kalok jalan idup kite
Kite harus ngumpol ilmu
Ntah agama ataupon dunia
Idup harus ngikot alam
Idup harus masuk surga

Semampu kite jage
Sekuat kite usaha
Sesempet kite begawe
Sepacak kite begerek
Jam dak kek nunggu kite
Ari dak kek kasian kek kite

Kite begawe, kite begawe besame-same

Dak de nebel garis perbedaan kite
Berusaha sebise kite
Dak de ari terus terang
Semue e tu punya waktu yang same

Tuhan tetep Maha adil
Maha Tau segale ape – ape
Kite disuroh yakin kek terus percaye
Bahwa dakde usaha yang sie - sie

Biak debu ni terus lalu lalang di adep kite
Biakr batang karet terus jerit didepan kite
Dari ari ke ari
Dari pagi ke sure
Yakin ujan agik tetep ade

Segale yang kite gawe harus trus begawe
Dak takot kalok kek saro
Dak takot kalok kek dak punye ape – ape
Kite tros lari kek lari dari miskin ne

Demi ari depan kite
Harus ade gerek miak
Jangen kite jadi nonton bai
Kasian kek ati kite
Harus ade gerek miak

Pasti ade jalan kite
Pasti ade rejeki kite
Tinggal kite sabar dak
Tinggal kite neg dak
Untuk terus melukis kek nyuson
Ape yang harus dilukis kek ditata

Mawak suyak, mawak suyak mikul pacul

Kite isik suyak kite kek keperluan kite se ade e
Se cukop e
Biar dak susah di ari kelak

Mikul pacol untuk segale kebutuhan kite di kebon
Galik akar pelawan yang ganggu sahang kite
Ngerumpot baweh sahang yang lah semek kek rompot e
Bersih – bersih pinggir bandar kebun biar sahang dak kalah kek bateng laen
Semue to dak kek buet sia – sia untuk di gawe

Ku kek ka miak
Kite tu lah buat ape yang dari duluk akek – akek kite gawe
Darik duluk yang digawe akek kite to sampai sekarang dak salah
Lah jadi warisan dari duluk
Jadi kite cuman ngembang e bukan ninggal e
Jangen lupak kek ape yang lah kite punye
Ayo kite kembang biak bebuah lebet kek biak tumbuh subur

Dari jaman akek antak duluk
Urang bangkek ngasil sahang
Kite harus tetep batahan miak
Banyek panghalang yang dateng di didepan
Kite harus siap miak
Terus jage ati kek jiwa kite
Jangen takot kek dek pacak
Jangen takot kek dek sanggup
Kite semue e same
Dimata Tuhan
Dimata urang beriman

Kite gi ke kebon ke ume

Kamis, 26 November 2009

Ngerawat ape yang kite punye
Untuk teros kite yakin
Lebih baik dari ape yang kate urang – urang
Kebon kek ume ya lah segale upaya kite

Lebih damai dari piker kite
Dak banyek piker yang macem – macem
Dak neg begawe yang macem – macem
Yang malah kadang jadi dak pasti arah e
Dak pasti jalan e

Kite harus yakin
Tuhan to ade
Maha pengasih kek umat e
Asal rajin do'a dan usaha
Semut pun dek tau kelaper meski jalan kek badan e kecit

Biaklah jam teros berlalu – lalang
Bilang kite dak ngikot perkembangan
Yang ade kite dak nambah duse kite kek alam
Dak ngerusek kek terus berik peluang idup untuk anak cucuk kite
Dak ninggel duse yang panjang kek peneros kite

Idup yang penting berkah e miak
Bukan nyarik kaya yang dek tau arah
Bukan nyarik harta yang dek jelas jalan e
Biak kite berdiri ape ade e
Biak kite jiat dilet urang
pecaye miak
Tu hanya sepengatau urang to bai
Yang tau kite cuman Tuhan dan kite sendirik
Yang ngerti kite cuman Kite dan Tuhan kite sendirik
Yang nilai kite ge Tuhan
Karena cuman Tuhan yang Maha Tau kek Maha Mengerti dalam menilai apapon

Yo miak

Nunggu ape agik kite kek bangun
Lah nua igek kite tiduk
Jangen cak - cak dek tau kek lingkongan sekeliling kite
Yang dari ari ke ari trus berubah
Semakin jauh neg niggal kite

Kite bukan urang yang dek pernah miker
Kite bukan urang males usaha
Kite bukan urang males begawe
Kite bukan urang yang pantes untuk ditinggal urang laen

Inget miak
Kite pernah bediri di sakan TI yang paling tinggi
Kite pernah nyelem di lubang camoi yang paling dalem
Pernah punya sahang yang ijau di kebun kite
Pernah punya timah sn 1,9 yang duluk agik murah untuk dijual

Ayo miak
Ka, ku bangun
Buat agik dinding yang tinggal di aci
Beli cet yang bagus untuk ngelamir kelak
Yakin ni semue e pasti jadi
Pasti berdiri
Lebih bagus dari umah - umah tetanggak kite